Komunikadu ba imprensa

Iha 09 Novembru 2011, iha prosesu 25/CO/2011/TR, Tribunál ba Rekursu konfirma Tribunál Distritál iha Dili nia desizaun ne’ebé kondena rekorrente Carlito de Jesus, Gilberto Lopes, Bendito Pinto Nunes no Saturnino Lopes, maibé kondena sira ho pena ki'ik-liu ida-ne’ebé Tribunál Distritál aplika.

Faktu provadu be fó-fatin ba kondenasaun ne’e nia rezumu maka ne’e:
Iha loron 6 Outubru 2009 Gilberto dehan ba Carlito, Bendito ho José da Silva katak, sira oho Bimeta ho Bue Ana karik, nia sei selu US$50.00 ba sira, tanba Bimeta ho Bue Ana kaer aimoruk ema-buan nian. Iha loron 9 Outubru 2009 Carlito ho Bendito ba iha Bimeta ho Bue Ana nia uma, atu oho sira. Sira na'in rua baku Bimeta ho Bue Ana nia ulun ho martelu ida, dala barak, atu halo sira mate. Hanoin katak Bimeta ho Bue Ana mate tiha ona, sira fila-fali. Maibé Bimeta ho Bue Ana la mate. Iha loron 6 Novembru 2011 Gilberto ko'alia fali ho Carlito no José da Silva atu oho Bimeta ho Bue Ana. Gilberto ho Carlito ba Bimeta ho Bue Ana nia uma no, iha ne’ebá, Carlito tesi-kotu Bue Ana nia kakorok, halo nia mate. Iha loron 9 Novembru 2011, kuandu nia la'o hamutuk ho Bimeta, Saturnino taa dala barak Bimeta nia kakorok no ulun ho katana ida. Lori tiha vítima nia isin-lolon ba Bimeta nia uma, nia lori alu ida baku dala barak Bimeta nia ain, tanba nia haré katak Bimeta nia isin sei book-án hela. Saturnino oho duni Bimeta. Gilberto, Carlito ho Bendito halo tuir planu be sira prepara uluk tiha atu oho Bue Ana ho Bimeta. Sira hakarak duni oho feto rua ne’e, maski sira hatene katak lei bandu sira oho ema. Saturnino hakarak oho Bimeta maski nia hatene katak lei bandu nia oho ema. Carlito ho Saturnino, ema agrikultór, hakribi sira nia hahalok ne’e. Gilberto, Carlito, Bendito no Saturnino seidauk lori kondenasaun tan krime ida. Saturnino, ho nia feen, iha oan ualu.

Iha audiénsia Cláudio Ximenes, Tribunál ba Rekursu nia Prezidente dehan ba arguidu sira-ne’e katak: “Oho-ema krime ida todan tebe-tebes. Lei bandu ema hotu-hotu oho ema ka halo kanek ema nia isin. Se maka iha buat ruma hasoru ema-ruma no hanoin katak ema tenke hetan kastigu tenke ba kesar ba polísia ka ba Prokuradór, hodi hala’o prosesu, atu fó-kastigu ba ema ne’e. Estadu maka bele fó-kastigu; ema ida-idak labele fó-kastigu ba ema-seluk. Iha prosesu ida-ne’e, imi na'in-haat oho ema na'in-rua. Tribunál hatene katak imi oho Bimeta ho Bue Ana tanba imi fiar katak sira ema-buan no imi fiar katak ema-buan iha podér atu halo ema seluk moras ka mate. Hori-uluk, molok ema-europeu sira mai too Timor-Leste, iha Europa ne’ebá mos ema fiar katak ema-buan halo-aat ba ema seluk; tanba ne’e ema europeu sira dala barak kaer ema be sira konsidera ema-buan hodi oho tiha. Sira halo buat-ne’e tanba sira nia matan sei taka hela no sira fiar katak ema-buan iha podér aat makaas tabe-tebes. Maibé, kuandu dezenvolvimentu too iha Europa, ema matenek barak mosu hodi hanorin buat oinoin, ema hotu haree ema-buan laiha podér atu halo-aat ba ema seluk. Sira la tauk tan ema-buan, tanba sira hatene katak ema-buan laiha podér atu halo-moras ka halo-mate ema ida. Oras-ne’e siénsia hatudu katak ema-buan laiha podér atu halo ema moras ka mate. Ema mate tanba ema seluk oho (ho surik, ho katana, ho rama, baku-mate, ka fó veneno ba nia hemu – la’ós ho buan nia kbi’it). Siénsia hatudu katak ema mate tanba moras, tanba laiha kondisaun di'ak ba saúde, tanba laiha limpeza, tanba susuk tata, tanba moras da'et hosi ema-ida ba ema-seluk, tanba be-mós laiha, tanba hahán laiha, tanba la ba ospitál ka la hemu aimoruk; la’os ema-buan maka halo ema moras ka halo ema mate. Se maka fiar katak ema-buan bele halo ema moras ka mate fiar sala, tanba ema-buan laiha podér atu halo ema moras ka mate. Ita tenke aprende moris iha kondisaun ne’ebé la halo ema moras. Ema ne’ebé moras tenke ba ospitál, doutór atu haré no fó aimoruk ba nia hemu. Labele hein too moras-todan ona maka ba ospitál.

Arguidu na'in haat ne’e oho ema na'in rua. Tribunál tenke fó-kastigu todan ba sira tanba sira oho ema na'in rua. Tribunál Distritál iha Dili kondena Gilberto ho prizaun tinan 20, Carlito ho prizaun tinan 19, Bendito ho tinan 12 no Saturnino ho tinan 14.

Kastigu ne’ebé Tribunál fó ba arguidu ida-idak labele todan-liu arguidu ida-idak nia sala. Tribunál ba Rekursu tenke tetu imi ida-idak nia sala hodi haree, tuir lei no justisa, pena be Tribunál Distritál fo ne’e lós ka lae.

Gilberto tenke simu kastigu todan-liu arguidu sira seluk. Nia maka haruka Carlito ho Bendito ba oho Bimeta ho Bue Ana. Gilberto la oho rasik; maibé lei konsidera katak nia mos oho Bimeta ho Bue Ana, tanba nia maka haruka oho. Sirkunstánsia rua de’it maka halo-kamán nia salan: nia seidauk hetan kondenasaun seluk no nia fiar (sala) katak Bimeta ho Bue Ana ema-buan be halo ema mate. Nia lori-todan kona-ba krime oho-ema tolu: krime omisídiu tentadu 2, hasoru Bue Ana ho Bimeta, krime omisídiu konsumadu ida, hasoru Bue Ana. Tanba krime omisídiu tentadu ida-idak Tribunál kondena nia ho pena prizaun tinan 5. Tanba krime omisídiu konsumadu Tribunál kondena nia ho pena prizaun tinan 12. Tau-hamutuk pena sira ne’e, Tribunál kondena Gilberto ho pena mesak prizaun tinan 15.

Carlito lori-todan kona-ba krime oho-ema tolu: krime omisídiu tentadu 2, hasoru Bue Ana ho Bimeta, krime omisídiu konsumadu ida, hasoru Bue Ana. Sirkunstánsia be halo-kamán nia salan maka sira-ne’e: nia fiar (sala) katak Bue Ana ho Bimeta ema-buan be halo ema mate, nia hakribi nia salan no seidauk hetan kondenasaun seluk. Tanba krime omisídiu tentadu ida-idak Tribunál kondena nia ho pena prizaun tinan 3. Tanba krime omisídiu konsumadu Tribunál kondena nia ho pena prizaun tinan 8. Tau-hamutuk pena sira ne’e, Tribunál kondena Carlito ho pena-mesak prizaun tinan 10.

Bendito lori-todan kona-ba krime oho-ema rua: krime omisídiu tentadu, hasoru Bue Ana ho Bimeta. Sirkunstánsia rua de’it maka halo-kamán nia salan: nia seidauk hetan kondenasaun seluk no nia fiar (sala) katak Bimeta ho Bue Ana ema-buan be halo ema mate. Tanba krime omisídiu tentadu ida-idak Tribunál kondena Bendito ho pena prizaun tinan 4. Tau-hamutuk pena sira ne’e, Tribunál kondena Bendito ho pena-mesak prizaun tinan 5.

Saturnino lori-todan kona-ba krime oho-ema ida, tanba nia oho Bimeta. Sirkunstánsia be halo-kamán nia salan maka sira-ne’e: nia fiar (sala) katak Bimeta ema-buan be halo ema mate, nia hakribi nia salan no seidauk hetan kondenasaun seluk. Tanba krime omisídiu konsumadu ne’e Tribunál kondena Saturnino ho pena prizaun tinan 8.
Tribunal ida ne’e laran metin katak imi nain haat no ema ne’ebé rona desizaun ida ne’e labele haluha tan katak lei bandu ema hotu-hotu oha ema, buan ka lae”.

Dili, 09 Novembru 2011