Presidente Tribunal de Recurso Partisipa iha DIM EXPO 2025 – Programa “Run for Palestine”

Iha loron 11 fulan Outobro 2025, Sua Exelénsia Dr. Afonso Carmona, Presidente Tribunal de Recurso, partisipa iha DIM EXPO 2025 – Programa Animasaun Dili Maratona Internasionál ho lema “Run for Palestine”.

Eventu ida ne’e hala’o ho objetivu atu demonstra solidariedade ba povu Palestina, hato’o mensajen kompromisu hodi promove paz, solidariedade humanitária no koezisténsia harmóniku iha rejiaun. Tema ida ne’e mos reprezenta dedikasaun Timor-Leste atu kontinua kontribui ba esforsu internasionál no rejional iha promosaun paz no unidade entre povu sira.

Maratona Internasionál ne’e envolve partisipasaun husi atleta sira husi rai laran no rai liur hato’o espírito esportivu, amizade no solidariedade entre nasaun sira.

Sua Exeléncia Presidente Tribunal de Recurso nia partisipasaun iha eventu ida ne’e hatudu enkorajamentu institusionál no partisipasaun ativa husi instituisaun justisa iha fomentu   valor paz no humanidade.