Iha loron 02 fulan Marsu 2026, Sua Exelénsia Prezidente Tribunal de Recurso, Dr. Afonso Carmona, partisipa iha Serimónia Resepsaun Loron Nasionál Japaun ne’ebé realiza iha Embaixada Japaun Dili, Timor-Leste.
Serimónia ne’e organiza husi Sua Exelénsia Embaixador Japaun ba Timor-Leste, Yamamoto Yasushi, ne’ebé konvida autoridade sira husi instituisaun estadu, korpu diplomátiku no parseiru dezenvolvimentu sira atu hamutuk selebra loron importante ida ba povu Japaun.
Iha nia diskursu ofisiál, Sua Exelénsia Embaixador Yamamoto Yasushi hateten katak nia apresenta ona nia karta kredensial ba Sua Exelénsia Prezidente da República, José Ramos-Horta, iha loron 9 fulan Janeiru 2026, no resepsaun Loron Nasionál ne’e mak resepsaun dahuluk ne’ebé nia organiza nudar uma-na’in iha Timor-Leste.
Embaixador refere mos katak nia rikusoin dahuluk mak istória amizade no koperasaun entre Japaun no Timor-Leste, ne’ebé harii husi antesesor sira durante kuartu sékulu liu desde Timor-Leste restaura nia independénsia. Nudar rezultadu hosi koperasaun ne’e, iha Timor-Leste — inklui iha área foho no remota sira — implementa ona projetu barak ne’ebé hetan apoiu husi Governu Japaun.
Área apoiu sira inklui dezenvolvimentu infraestrutura, diversifikasaun ekonomika (inklui agrikultura no peska), redusaun risku dezastre, transformasaun verde, governasaun, dezenvolvimentu rekursu umanu, no mos área edukasaun no saúde.
Sua Exelénsia Embaixador mos hato’o katak durante nia enkontru ho Sua Exelénsia Prezidente da República, nia sei kontinua servisu makas hanesan nia antesesor sira ne’ebé kontribui barak ona ba relasaun bilateral rua ne’e. Nia reafirma mos katak durante nia mandatu iha Timor-Leste, nia sei halo esforsu tomak atu promove progresu konkretu iha relasaun bilateral entre Japaun no Timor-Leste.
Prezensa Sua Exelénsia Prezidente Tribunal de Recurso iha eventu diplomátiku ne’e reflete kompromisu instituisaun judisiál Timor-Leste nian atu kontinua hametin relasaun institusionál no amizade entre nasaun sira.