Sua Exelénsia Prezidente Afonso Carmona ho komitiva husi Tribunal de Recurso to’o iha rejiaun Oecusse iha loron 05 Marsu 2026, hodi halo vizita servisu ba Tribunal Judicial Primeira Instánsia Oecusse.
Vizita ofisial refere realiza durante loron 06 no 07 Marsu 2026, ne’ebé Prezidente ho komitiva halo atividade oioin atu hare diretamente kondisaun servisu no infraestrutura tribunal nian.
Durante vizita ne’e, Sua Exelénsia Prezidente halo enkontru jerál ho Juiz Administrador, Ofisiais Justisa no funsionáriu sira husi tribunal refere. Iha enkontru ne’e, Prezidente hakarak rona diretamente preokupasaun no dezafiu sira ne’ebé funsionáriu sira hasoru durante hala’o servisu iha tribunal.
Iha oportunidade ne’e mos, Prezidente Dr. Carmona halo sosializasaun informasaun importante kona-ba instalasaun Supremo da Justisa, no projetu konstrusaun edifísiu tribunal no rezidénsia ba juiz sira ne’ebé sei realiza iha munisípiu sira hanesan Ermera, Baucau, Bobonaro (Maliana) no Viqueque.
Iha enkontru jerál ne’e, Prezidente mos koalia kona-ba promosaun ba funsionáriu sira. Tuir nia hateten, funsionáriu ne’ebé hakarak hetan promosaun tenke identifika didiak tuir regra jerál funsaun públiku, ho objetivu atu garante servisu justisa ne’ebé diak. Promosaun refere mos depende ba nível edukasaun hanesan sekundáriu no lisensiatura, no mos avaliasaun ba kapasidade no dezenpeñu servisu funsionáriu sira nian.
Dr. Carmona subliña katak funsionáriu sira tenke halo servisu ho diak atu bele hetan konfiansa no oportunidade ba dezenvolvimentu karreira iha sistema justisa.
Aleinde ne’e, Prezidente mos koalia kona-ba planu formasaun iha estranjeiru ba elementu sira iha setor justisa, inklui 12 juiz, 12 ofisiais justisa no 12 funsionáriu. Atu realiza planu ne’e, komitiva Tribunal de Recurso halo ona komunikasaun ho nasaun relevante hanesan Indonesia no Philippines, liu-liu iha sidade Jakarta no Manila.
Depois de enkontru, Sua Exelénsia Prezidente ho komitiva halo vizita direta ba edifísiu Tribunal Judicial Primeira Instánsia Oecusse atu hare kondisaun infraestrutura tribunal nian. Husi observasaun ne’e, identifika katak iha fasilidade balun ne’ebé presiza hadia, hanesan sela sira, sala espera, sala arkivu dokumentu no fasilidade seluk tan.
Komitiva mos observa katak iha parte balun husi edifísiu tribunal ne’ebé durante ne’e utiliza hela husi ema balun no parte seluk abandona hela, ne’ebé presiza atensaun atu garante kondisaun servisu tribunal ne’ebé diak.
Vizita ofisial ne’e nu’udar parte husi esforsu Tribunal de Recurso atu hare diretamente kondisaun servisu iha tribunal sira iha rejiaun, no buka solusaun ba dezafiu sira atu hasa’e diak liu tan servisu justisa iha rai laran.