DILI, 09 Marsu 2026 – Diresaun Nasionál Rekursu Umanu (DNRH) husi Tribunal de Rekursu, ne’ebé lidera husi Diretor Nasionál hamutuk ho Xefe Departamentu sira, hala’o enkontru koordenasaun ho Institutu Nasionál Siguransa Sosiál (INSS). Enkontru ne’e foka liu ba kestaun estratéjika ho tema: “Sistema Digitalizasaun Dadus ba INSS”.
Objetivu prinsipál husi sorumutu ne’e mak atu haforsa kooperasaun entre instituisaun rua ne’e, liuliu iha kestaun modernizasaun servisu administrasaun nian.
Digitalizasaun no Fasilidade Asesu
Iha enkontru refere, Inspetór Jerál INSS ho ekipa téknika kria etika katak sira dezenvolve ona sistema online (módulu) foun. Sistema ne’e dezenvolve hodi:
- Fasilita asesu: Atu empregadór no instituisaun sira bele asesu ho lalais ba sistema seguransa sosiál.
- Autonomia ba Empregadór: Permite instituisaun sira hodi kria rasik sira-nia invoice ba pagamentu.
- Papél Ponto Fokál: INSS husu kooperasaun husi Ponto Fokál DNRH Tribunal de Rekursu nian hodi aprezenta dadus foun no kompletu husi kada funsionáriu, atu nune’e prosesu digitalizasaun prestasaun servisu nian bele la’o ho efisiente.
Klarifikasaun kona-ba Direitu Pensaun no Benefísiu
Aleinde kestaun téknika digitalizasaun, Inspetór Jerál no Xefe Departamentu husi INSS mós fó esplikasaun kle’an kona-ba rekizitu sira atu asesu ba pensaun, hanesan Pensaun Morte, Sobrevivénsia, Invalidez, no Velise.
Pontu xave ba kritériu kontribuisaun nian mak hanesan tuir mai:
- Pensaun Reforma: Funsionáriu tenke iha kontribuisaun mínimu durante tinan 6 ba leten.
- Pensaun Sobre vivénsia: Tenke kumpri períodu kontribuisaun nian durante tinan 5 ba leten.
- Lisensa Maternidade: Funsionáriu feto sira iha direitu ba benefísiu ne’e bainhira iha ona kontribuisaun fulan 6 ba leten.
Enkontru ne’e remata ho kompromisu hamutuk atu kontinua servisu hodi asegura katak funsionáriu hotu iha Tribunal de Rekursu bele hetan sira-nia direitu seguransa sosiál ho di’ak liu tan liu husi sistema foun ne’ebé modernu no transparente.