Díli, 10 Marsu 2026 – Sua Excelénsia Presidente Tribunal de Recurso, Dr. Afonso Carmona, ohin simu visita husi equipa missaun internasionál ida ne’ebé kompostu husi reprezentante sira husi Camões – Instituto da Cooperação e da Língua, I.P. (Portugal), Agência Italiana de Cooperação para o Desenvolvimento (AICS) no Ministério dos Negócios Estrangeiros da República da Lituânia.
Visita refere hala’o ho objetivu atu realiza reuniaun ida kona-ba programa “E-Governance for the Judicial System in Timor-Leste (e-JUSTL)”, ne’ebé finansia husi União Europeia, atu apoiu prosesu modernizasaun no digitalizasaun sistema judisiál iha Timor-Leste.
Reuniaun ne’e konsidera iha importánsia estratéjika tanba permite halo aliñamentu institusionál no estratéjiku kona-ba modelu implementasaun programa refere. Inisiativa e-JUSTL visa reforsa efisiénsia administrativa, aumenta transparénsia no fasilita asesu públiku ba justisa, tuir prioridade nasionál no kompromisu internasionál Timor-Leste nian iha área boa governasaun no Estadu de Direitu.
Durante reuniaun ne’e, parte sira diskute mos kona-ba modalidade implementasaun programa, ho objetivu atu asegura apropriasaun nasionál ne’ebé forte no promove koordenasaun efetiva entre instituisaun sira ne’ebé envolve.
Espera katak liu husi kooperasaun ne’e, programa e-JUSTL sei kontribui ba sustentabilidade no impaktu estrutural iha prosesu modernizasaun sistema judisiál Timor-Leste.
Reuniaun refere realiza iha Sala de Julgamentu Tribunal de Recurso, Caicoli, Díli.