Serimónia refere realiza iha Centro de Formação Jurídica e Judiciária (CFJJ), ho partisipasaun husi entidade importante sira iha área justisa, inklui Sua Excelénsia Ministru Justisa, Sua Excelénsia Procurador-Geral Repúblika, Defensor Públiku Jerál, Prezidente Komisaun relevante husi Parlamento Nacional de Timor-Leste, Diretór Polícia de Investigação Criminal (PICIC), Diretór-Jerál Polítika Justisa, Diretór CFJJ, no mos Sua Excelénsia Embaixadór Brazil iha Timor-Leste.
Formandu sira ne’ebé partisipa iha kursu formasaun inisial ne’e hamutuk ema nain 36, ne’ebé prepara atu tama ba kareira magistratura judisial, ministériu públiku no defensoria públika.
Iha nia diskursu, Sua Excelénsia Ministru Justisa hateten katak Governu sei kontinua servisu hamutuk ho parseiru sira atu konsolida instituisaun justisa no fortalesé sistema jurídiku iha Timor-Leste. Nia mos subliña katak kooperasaun bilateral no multilateral, liu-liu iha ambitu Comunidade dos países da Lingua Portuguêsa (CPLP), sei kontribui atu dezenvolve kapasidade instituisaun justisa no hametin Estadu Direitu Demokrátiku iha nasaun.
Iha okaziaun ne’e, Ministru Justisa mos fó apresiasaun ba kontribuisaun husi formadór sira, inklui Dra. Cristina, Dr. Victor, Dr. Rodrigo no formadór sira seluk, ne’ebé fó apoiu importante ba prosesu formasaun no preparasaun jerasaun foun profisionál iha área justisa.