Iha loron 27 fulan Marsu tinan 2026, Sua Exelénsia Prezidente Tribunal de Recurso, Dr. Afonso Carmona, partisipa iha serimónia komemorasaun aniversáriu Polícia Nacional de Timor-Leste (PNTL) ba dala XXVI, ne’ebé hala’o iha Palácio do Governo.
Depois de Sua Exelénsia sira to’o iha fatin serimónia, hala’o kedas apresentasaun forsa iha parada ba inspetor serimónia. Tuirmai, Sua Exelénsia Primeiro-Ministro de Timor-Leste revista ba parada no simu estandarte nasionál ne’ebé tama iha kampu parada.
Serimónia kontinua ho hakmatek minutu ida atu hato’o respeitu ba eróis no mártires sira. Iha mos tomada de pose Komandante Jeral no Segundu Komandante Jeral PNTL, no entrega kondekorasaun “Ordem de Timor-Leste”.
Iha oportunidade ne’e, Komandante Jeral PNTL no mos Sua Exelénsia Primeiro-Ministro RDTL hato’o diskursu sira. Iha diskursu Primeiro-Ministro hateten katak lideransa seguransa, liuliu komandante sira, tenki servisu ho di’ak atu assegura estabilidade no seguransa iha rai laran.
Haktuir mos katak ho entrada ASEAN, Timor-Leste sei enfrenta dezafiu sira iha kuadru polítiku tinan 2027-2028, inklui eleisaun no manifestasaun sira. Tanba ne’e, espera katak Polísia bele atua ho profisionál no responsavel atu garante seguransa públiku.
Liu tan, Sua Exelénsia Primeiro-Ministro koalia ba hotu-hotu atu halo refleksaun kona-ba servisu ne’ebé halo ona, atu nune’e povu bele iha konfiansa ba Polísia iha seguransa rai ida ne’e nian.
Depois de remata serimónia, Sua Exelénsia Prezidente Tribunal de Recurso kontinua partisipa iha almosu konfraternizasaun iha Centro de Convenções de Díli (CCD).Depois de almosu konfratenizasaun sua exelénsia Presidente Tribunal de Recursu entrega mos premiu ba manan nain kompetisaun Drum Band ne’ebe partisipas husi Estudante Nivel Sekundariu iha Munisipiu Dili inklui eskola Pre Secundaria Santa Terezinha do Menino Jesus Bedois.