Jakarta, 8 Abril 2026 — Diretur Jeral Tribunal de Recurso, Sr. Cipriano Sarmento da Costa Lopes, hamutuk ho ekipa husi Tribunal de Recurso Repúblika Demokrátika Timor-Leste, partisipa iha reuniaun koordenasaun ho Mahkamah Agung Republik Indonesia iha Jakarta, iha loron 8 no 9 Abril 2026.
Atividade ne’e realiza tuir Despachu Nú. 28/2026, ne’ebé fo kompeténsia ba Prezidente Tribunal de Recurso, tuir Konstituisaun Repúblika Demokrátika Timor-Leste, Lei Nú. 25/2021, loron 2 Dezembru (Lei Organizasaun Judisiária), no mos Decretu-Lei Nú. 34/2012, ne’ebé altera ona husi Decretu-Lei Nú. 11/2016, loron 11 Maiu.
Reuniaun ne’e hala’o ho objetivu atu reforsa koperasaun institusionál no promove dezenvolvimentu atividade judisiária entre instituisaun rua refere. Inisiativa ida ne’e mos sai hanesan seguimentu ba Nota Entendimentu (MoU) ne’ebé asina iha loron 11 Fevereiru 2026 entre Prezidente Supremu Tribunal Repúblika Indonesia no Prezidente Tribunal de Recurso Timor-Leste.
Tuir Artigu 6 husi nota refere, kona-ba koordenasaun no ezekusaun, reuniaun ida ne’e envolve ekipa ofisiál ligasaun husi instituisaun rua atu asegura implementasaun efetiva husi akordu refere, liu-liu iha área edukasaun no formasaun iha área direitu no justisa.
Iha reuniaun ne’e, Mahkamah Agung Republik Indonesia reprezenta husi Sekretáriu MA, Sugiyanto, SH., MH., ho akompañamentu husi Xefe Badan Estratéjia Polítika no Edukasaun no Formasaun Hukum no Peradilan (BSDK), Syamsul Arief, SH., MH., no mos juízes yudisiál balu.
Diskusaun sira hare ba aspetu importante balu atu sai baze programa formasaun ba juízes, Ofisiais de Justisa no Funsionariu sira. Pontu prinsipál haat ne’ebé diskuti mak:
- Lokalizasaun no infraestrutura ba formasaun
- Identifikasaun no seleksaun formadór no partisipante sira
- Preparasaun detallu materiál no kuríkulu formasaun
- Aspetu lojístiku no kustu ezekusaun programa
Reuniaun ne’e hanesan pasu konkretu ida atu asegura implementasaun efetiva husi koperasaun bilateral iha área judisiária entre Timor-Leste no Indonesia.