Dili, 18 Julho 2026 – Sua Exelénsia Prezidente Tribunal de Recurso, Dr. Afonso Carmona, partisipa iha Semináriu Internasionál kona-ba “O Legado dos Prelados de Timor”, atividade ida ne’ebé integra iha komemorasaun transladasaun restus mortais preladu katóliku no figura histórica sira Igreja Katólika Timorense nian.
Semináriu internasionál ne’e halao iha Salão São José, Parókia Catedral Dili, ho objetivu atu aprofunda koñesimentu kona-ba kontribuisaun no legadu ne’ebé preladu sira husi Igreja Katólika Timorense husik ba Igreja no ba konstrusaun sosiedade Timor-Leste.
Oradór sira iha semináriu ne’e mak Pe. Pedro Daniel Faria Rodrigues no Pe. Domingos Alves, ne’ebé fahe sira-nia hanoin kona-ba papel importante preladu sira desempenha iha desenvolvimentu espirituál, edukativu, sosial no históriku Timor-Leste nian.
Semináriu ne’e mos hetan onra ho prezensa Sua Eminénsia Dom Virgílio Cardeal do Carmo da Silva, SDB, membru Governu sira, reprezentante instituisaun estatais no relijiozas, estudante sira, no konvidadu sira husi diversos setor.
Eventu sientífiku no eklésiál ida ne’e realiza nu’udar parte husi solenidade komemorativa ne’ebé presta omenajen no valoriza legadu husi preladu no figura importante sira iha istória Igreja Katólika Timorense, liuliu Dom Jaime Garcia Goulart, Dom José Joaquim Ribeiro, Monsenhor Martinho da Costa Lopes no Dom Alberto Ricardo da Silva, ne’ebé durante sira-nia moris fó kontribuisaun boot ba evanjelizasaun, edukasaun no dezenvolvimentu ba povu Timor-Leste.
Partisipasaun Sua Exelénsia Prezidente Tribunal de Recurso iha semináriu internasionál ida ne’e reflete kompromisu Tribunal de Recurso atu valoriza patrimóniu históriku, kultura no espiritualidade, nune’e mos atu fó apresiasaun ba lideransa no kontribuisaun ne’ebé Igreja Katólika fó ona ba prosesu dezenvolvimentu no konsolidasaun Timor-Leste hanesan Estadu ida ne’ebé Demokratiku no fundamental ba respeitu dignidade umana.