Thailand, 21 Jullu 2026 – S.E. Prezidente Tribunal de Recurso, Dr. Afonso Carmona, hamutuk ho delegasaun Tribunal de Recurso, partisipa iha 15th ASEAN Law Association General Assembly no 13th Meeting of the Council of ASEAN Chief Justices, ne’ebé realiza iha Grand Ballroom, InterContinental Hotel, Bangkok, Thailand. Enkontru internasionál ida-ne’e halibur hamutuk Prezidente Sumpremu Tribunal sira, juízes, peritu legal no reprezentante instituisaun judisiáriu husi nasaun membru ASEAN sira, ho objetivu atu hametin kooperasaun judisiál no dezenvolve sistema justisa iha rejiaun.

Serimónia abertura eventu ne’e loke ofisialmente husi S.E. Prezidente Supreme Court of Thailand, ne’ebé iha nia diskursu enfatiza importánsia solidariedade no kooperasaun entre instituisaun judisiáriu sira iha ASEAN hodi hametin Estado de Direito, independénsia judisiál, no promove asesu ba justisa ne’ebé efetivu ba komunidade sira iha rejiaun.

Iha enkontru ne’e, delegasaun husi nasaun membru ASEAN sira halo diskusaun kona-ba dezafiu no oportunidade sira ne’ebé hasoru sistema judisiáriu iha tempu atual, inklui utilizasaun teknolojia iha administrasaun tribunál, dezenvolvimentu kapasidade rekursu umanus, asesu ba justisa ba sidadaun sira, no mekanizmu atu hametin kooperasaun entre tribunál sira iha rejiaun ASEAN.

Partisipasaun S.E. Prezidente Tribunal de Recurso no ekipa Tribunal de Recurso iha fórum internasionál ida-ne’e demonstra komitmentu Tribunal de Recurso Timor-Leste atu kontinua partisipa ativamente iha kooperasaun judisiál rejionál, hodi troka esperiénsia, aprende boas prátikas husi nasaun membru sira, no kontribui ba dezenvolvimentu sistema justisa ne’ebé modernu, transparante no efisiente.

Liuhusi partisipasaun iha 15th ASEAN Law Association General Assembly no 13th Meeting of the Council of ASEAN Chief Justices, Tribunal de Recurso espera bele reforsa relasaun instituisionál ho tribunál no instituisaun judisiáriu sira iha ASEAN, promove diálogu konstrutivu, no haforsa kapasidade institusionál atu fó servisu justisa ne’ebé di’ak liu ba povu Timor-Leste.