Díli, 17 Jullu 2026 – Sua Exelénsia Prezidente Tribunal de Recurso, Dr. Afonso Carmona, partisipa iha Serimónia Tomada de Posse ba Ofisiál Justisa sira, ne’ebé realiza iha edifísiu Ministério Público – Procuradoria-Geral da República, Díli.
Serimónia ne’e hahú ho aprezentasaun relatóriu husi orientadora kona-baprosesu formasaun no preparasaun kandidatu Ofisiál Justisa sira. Tuirmai realiza juramentu no tomada de posse, ne’ebé marka oficialmente hahú sira-nia knaar hanesan Ofisiál Justisa. Depois hosi ne’e, empossadu sira halo asinatura ba Termu de Posse no simu sertifikadu hanesan prova ba remata ho susesu prosesu formasaun no nomeasaun.
Iha okaziaun ne’e, reprezentante husi Ofisiál Justisa sira ne’ebé foin tomada de posse hato’o diskursu ida atu agradese ba orientador sira, lideransa institusionál no parte hotu ne’ebé fó apoiu durante prosesu formasaun. Iha diskursu ne’e mos reafirma komprimisu atu hala’o sira-nia dever ho integridade, imparsialidade, profesionalizmu no responsabilidade, hodi fó kontribuisaun ba fortalecimentu sistema judisiáriu no servisu públiku iha Timor-Leste.
Iha serimónia, Digníssimu Dr. Nelson de Carvalho, hanesan PrezidenteConselho Superior do Ministério Público (CSMP), hato’o diskursu ida ne’ebé subliña katak Ofisiál Justisa sira iha papel estratéjiku ida iha administrasaun justisa. Nia enfatiza katak, iha hala’o sira-nia knaar, tenke sempre hakruk ba Konstituisaun, lei sira, prinsipiu independénsia, étika no responsabilidade profissional, atu garante atendimentu ne’ebé efisiente, transparente no justu ba sidadaun sira.
Serimónia ne’e mos partisipa husi membru Conselho Superior do Ministério Público, magistradu sira, reprezentante husi instituisaun judisiál no estadu sira, lideransa institusionál, familia husi empossadu sira, no konvidadu sira seluk. Realizasaun serimónia ida-ne’e reflete komprimisu instituisaun judisiáriu sira atu kontinua hametin kapasidade rekursu umanu no promove servisu justisa ne’ebé profesional, íntegru no besik liu ba povu.