Iha loron 29 to’o 30 fulan Agostu, Sua Exelénsia Prezidente Tribunal de Recurso, Dr. Afonso Carmona, hamutuk ho Juíza Konselleira, Dra. Jacinta Correia, no delegasaun husi Tribunal de Recurso, partisipa iha Missa Agradesimentu no atividade komemorasaun ba Loron Konsulta Popular ba dala 27, ne’ebé hala’o iha Munisípiu Manatutu.
Partisipasaun S.E, Presidente Tribunal de Recurso iha komemorasaun ida-ne’e nu’udar forma ida atu hametin memória nasional no fó respeitu ba luta no sakrifísiu husi ita-nia luta-na’in sira ne’ebé laiha ona ho ita. Maibe Sira-nia luta no sakrifísiu importante tebes iha prosesu istóriku ne’ebé lori Timor-Leste ba independénsia.
S.E, Presidente Tribunal de Recurso mós partisipa iha Refleksaun Nasional hanesan órgaun soberanu ida, ho tema “Lori Esperansa ba Mundu”. Tema ida-ne’e sai hanesan oportunidade atu hamoris fila-fali esperansa no hanoin kona-ba futuru Timor-Leste, liuhusi memória istórika, unidade no komprimisu husi ita hotu atu kontinua harii nasaun.
Liuhusi refleksaun ne’e, partisipante sira konvida atu hanoin fila-fali kona-ba valor sira ne’ebé ita-nia povu defende no conquista liuhusi luta no sakrifísiu. Ida-ne’e mós sai momentu atu hatudu respeitu no omenajen ba luta-na’in no mártir sira ne’ebé fó sira-nia moris ba nasaun.
Iha parte seluk, delegasaun, Diretor-Jeral no diretór sira husi Tribunal de Recurso, membru Governu no komunidade Munisípiu Manatutu, partisipa iha marcha saudável ne’ebé hahú husi Ponte Manatutu to’o iha fatin serimónia iha oberato.
Marcha ne’e la’ós de’it atividade fizika, maibé mós sai símbolu ida husi unidade, amizade no solidariedade entre instituisaun públika no povu. Atividade ne’e hatudu katak ita hotu hamutuk iha kompromisu atu hanoin fila-fali Loron Konsulta Popular ba dala 27 no valoriza istória no memória nasional.
Komemorasaun Loron Konsulta Popular ba dala 27 iha Munisípiu Manatutu sai hanesan momentu importante ida atu hametin unidade nasional, preserva memória kolektiva no inspira gerasaun sira ohin loron atu kontinua lori Timor-Leste ba futuru ne’ebé di’ak liután, ho esperansa, dame, justisa no solidariedade.