Dili, 10 de Setembru de 2026 — Sua Exelénsia Prezidente Tribunal de Recurso, Dr. Afonso Carmona,  fo Tomada de Posse ba Auditor Koordenadór no Auditores Xefe, ne’ebé realiza iha Gabinete Tribunal de Recurso, Dili.

Serimónia Tomada de Posse ne’e hala’o hodi formaliza nomeasaun no atribuisaun responsabilidade ba Auditor Koordenadór no Auditores Xefe iha unidade sira-ne’ebé kompostu husi unidade lima, hodi asegura ezekusaun knaar no responsabilidade auditoria ho efisiénsia, transparénsia no profisionalizmu.

Iha serimónia ne’e, sira ne’ebé simu pose mak:

  1. Unidade de Consultadoria e Planeamento — Dra. Aidil Auxiliadora, nu’udar Auditora Xefe;
  2. Unidade de Auditoria — Dr. Betoven dos Reis Salsinha Santos, nu’udar Auditor Xefe;
  3. Unidade de Verificação Interna de Contas — Dra. Esmenia Tilman Gonçalves, nu’udar Auditora Xefe;
  4. Unidade de Relatório e Parecer da Conta Geral do Estado — Dr. Graciano Abril de Oliveira, nu’udar Auditor Xefe; no
  5. Unidade de Fiscalização Prévia — Dr. Agapito Soares Santos, nu’udar Auditor Xefe.

Iha pozisaun Auditor Koordenadór, simu pose Dra. Edigia F. A. S. Martins, ne’ebé sei iha responsabilidade atu koordena no orienta atividade auditoria iha unidade sira, tuir kompeténsia no responsabilidade ne’ebé atribui ba nia.

Iha oportunidade ne’e, Dra. Edigia F. A. S. Martins, nu’udar Auditora Koordenadóra, halo diskursu badak, hodi hato’o ninia apresiasaun no komitmentu atu hala’o knaar ho dedikasaun, integridade no responsabilidade, hodi kontribui ba hametin sistema auditoria iha Tribunal de Recurso.

Iha ninia diskursu, Sua Exelénsia Prezidente Tribunal de Recurso, Dr. Afonso Carmona, hato’o orientasaun no mensajen ba Auditor Koordenadór no Auditores Xefe hotu atu hala’o sira-nia knaar ho integridade, imparsiálidade, responsabilidade no profisionalizmu, no nafatin kumpre prinsípiu no regra sira ne’ebé regula atividade auditoria.

Sua Excelénsia mos subliña importánsia auditoria nu’udar parte importante hodi apoia boa jestaun, responsabilizasaun no hadi’a efisiénsia iha servisu institusionál. Liuhusi kolaborasaun no koordenasaun di’ak entre unidade sira, atividade auditoria bele kontribui ba hametin transparénsia no konfiansa iha instituisaun.

Serimónia Tomada de Posse ne’e remata ho espíritu komitmentu no responsabilidade, ho esperansa katak Auditor Koordenadór no Auditores Xefe foun sira bele hala’o sira-nia knaar ho dedikasaun no profesionalizmu, hodi kontribui ba dezenvolvimentu no fortalese Tribunal de Recurso.