DILI, 27 abríl 2021 (TATOLI)—Prezidente Tribunál Rekursu (PTR), Deolindo dos Santos informa, iha ámbitu enkontru ho Prezidente Repúblika, Francisco Guterres Lú Olo, katak maske iha serka sanitária maibé servisu tribunál sira-nian iha primeira instánsia no mós iha Tribunál Rekursu nian la’o normál ho forma ne’ebé di’ak.

“Ohin, mai informa ba Prezidente Repúblika Francisco Guterres Lú Olo kona-ba servisu Tribunál iha primeira instánsia. Mezmu ita hasoru situasaun ne’ebé defísil liuliu iha serka sanitaria nia laran, maibé servisu Tribunál Rekursu nian la’o ho forma ne’ebé di’ak iha primeira instansia no mós iha Tribunál Rekursu rasik,” Deolindo dos Santos hateten ba jornalista sira, hafoin hala’o enkontru ho Xefe Estadu iha Palásiu Prezidensiál Nicolau Lobato, Bairru Pite, Dili, tersa ne’e.

Aleinde ne’e, Prezidente Tribunál Rekursu ne’e informa ba Xefe estadu kona-ba prosesu balun ne’ebé liga ho servisu juis nian tanba iha ona desizaun konsellu nian atu halo fali prosesu inspesaun ba juis sira hotu inklui Prezidente Tribunál Rekursu nian.

Ba juis sira-ne’ebé iha terseira klase, nia dehan, prosesu inspesaun agora la’o daudauk ona no sei finaliza iha tempu badak, maibé tarde liu ne’e to’o inísiu tinan oin (2022) no iha prosesu inspesaun ne’e bele hatene katak iha juis balun bele aumenta tan.

Nune’e mós informa ba Xefe Estadu kona-ba prosesu konkursu ba rekrutamentu juis foun nian iha previzaun katak mínimu 15 juis ba kandidatu foun ne’ebé agora daudaun ne’e la’o hela.

“Problema ida hasoru ne’e konklui ona, la’o tuir previzaun ne’ebé iha. Maibé, esforsu no la’o tuir nafatin buat ne’ebé akontese iha tempu badak nia-laran, atu bele hetan juis foun nune’e bele reforsa tan servisu Tribunál nian,” nia dehan.

Bainhira inspesaun hotu tiha ona, nia hateten, promosaun ba juis hosi segunda klase ba primeira klase, terseira klase ba segunda klase entaun númeru iha kraik ne’e sei mamuk barak entaun sira presiza prenxe tanba prosesu sei la’o hela.

Agora daudauk ne’e grupu primeira klase kuaze iha Tribunál Rekursu ne’e iha nain-lima (5) maibé ida mate ona, entaun hela na’in haat ne’ebé agora iha Tribunál Rekursu. Grupu ba segunda klase ne’e, kuaze agora daudauk sei iha primeira instánsia, na’in neen (6) no restu ba terseiru klase hotu.

“Inspesaun ne’e agora daudauk la’o ona. Maibé ba hotu-hotu komesa hosi primeira klase ho terseira klase hotu. Ne’ebé, konsellu aprova ona ne’e la’o hela, ita espera katak buat ne’e bele hotu iha tempu badak nia-laran,” nia hateten.

Entretantu, iha enkontru ne’e Prezidente Repúblika Francisco Guterres Lú Olo fó korajen nafatin atu juis sira bele halo servisu ho maneira ne’ebé di’ak liután, mezmu situasaun defísil atu bele asegura sidadaun sira-nia direitu atu hetan asesu ba justisa.

Jornalista: Osória Marques