Ermera, loron 04 fulan Agostu tinan 2025 – Sua Excelência Prezidente Tribunal Recurso, Dr. Afonso Carmona, partisipa iha serimónia abertura Formasaun no Dezenvolvimentu ba Funsionárius Tribunais sira, ne’ebé hala’o iha Sentru Formasaun Fundação Cicanada – STVJ iha Fatuquero, Gleno, Munisípiu Ermera.
Formasaun no dezenvolvimentu ne’e organiza tuir Dekretu-Lei n.º 38/2012, de 1 de Agostu, konaba Regime da Formação e Desenvolvimento da Função Pública, ne’ebé estabelese katak formasaun contínua mak obrigatória ba funsionáriu públiku sira, atu aumenta kompeténsia no profisionálizmu iha prestasaun servisu ba povu.
Formasaun ne’e iha objetivu atu hasae kapasidade tékniku no profisionál funsionáriu Tribunal sira, hodi fó kontribuisaun ba administrasaun justisa ne’ebé efisiente no asesível ba komunidade.
Iha serimónia ne’e, mak partisipa husi autoridade sira importante hanesan:
- Prezidente Autoridade Munisípiu Ermera, representa husi Sekretaria Estadu;
- Komandante PNTL Munisípiu Ermera, Sr. Ludgenio Picancio Madeira Lay;
- Xefe Suku Fatuquero no Ofisiál Polísia Komunitária;
- Prezidente Fundação STVJ, Sr. António Cepeda;
- Diretor Jerál Tribunal Recurso
- Diretor SEFOPE Munisípiu Ermera;
- Diretores Nasionais;
- Chefes Departamentu, Formador no Formandu sira.
Iha okazion ne’e, Dr. Afonso Carmona hateten katak formasaun kontinuadu mak base importante atu garante servisu tribunal sira bele fó resposta ba nesesidade povu Timor-Leste.
Formasaun ne’e resulta husi kooperasaun entre Tribunal Recurso, Fundação STVJ no instituisaun sira seluk, hodi mostra kompromisu komún ba dezenvolvimentu kapasidade profisionál iha área justisa iha Timor-Leste.