Iha loron 30 fulan Outubru 2025, Sua Exelénsia Prezidente Tribunal de Recurso, Dr. Afonso Carmona, hamutuk ho Juízes Konselherus, orgullu simu Sua Exelénsia Primeiro-Ministru Kay Rala Xanana Gusmão iha Aeroportu Nicolau-Lobato Díli.
Resebimentu ida ne’e mak hatudu konsiderasaun no apresia boot husi Prezidente Tribunal de Recurso no Juízes Konselherus ba liderança nasional, liu husi tempu ne’ebé Primeiro-Ministru Xanana Gusmão lori Timor-Leste tama ofisiálmente ba ASEAN (Assosiasaun Nasaun-Nasaun Sudeste Aziátiku).
Iha nia diskursu, Sua Exelénsia Primeiro-Ministru hatete katak tama iha ASEAN mak oportunidade no responsabilidade boot ba Timor-Leste. Nia sublinha mos katak joven sira tenki prepara an ho diak, hadia mindset no aprende hodi kontinua kontribui ba dezenvolvimentu rai ida-ne’e.
Primeiro-Ministru dehan tan: “Joven sira labele husu deit saida mak estadu fo ba imi, maibé buka mos saida mak imi bele fo ba estadu no rai ida-ne’e.”
Visita ne’e mos fo oportunidade atu fortalese relasaun entre poder judisiáriu no poder ezekutivu, hanesan parte importante iha esforsu komún hodi kontinua hadia governasaun no justisa iha Timor-Leste.