Díli, 30 Outubru 2025 — Sua Exeléncia Presidente Tribunal de Recurso, Dr. Afonso Carmona, partisipa iha serimónia Asina Termu de Aseitasaun Edifísiu Tribunal Judisiál Primeira Instánsia no Residensia ba Juízes iha Munisípiu Viqueque, Bobonaro, Baucao no Ermera.
Serimónia ida ne’e reprezenta etapa importante iha esforsu Governu Timor-Leste, liu husi Ministériu Obras Públikas no Ministériu Justisa, atu fortalese infraestrutura sistema judisiál nian iha nivel distritu, hodi garante asesu justisa ba povu hotu-hotu.
Iha serimónia Termu de Aseitasaun ne’e, mos partisipa Diretor Jeral Tribunal de Recurso, hamutuk ho diretores kompanhia konstrusaun sira ne’ebé sei responsavel implementa projetu sira refere.
Husi kompanhia sira ne’e mak:
- Kompanhia Bonavide Unipessoal, Lda (Timor-Leste), ne’ebé reprezentadu husi Sra. Lily Ivan Ching, responsável ba iha Munisipiu Viqueque;
- Kompanhia Jiangsu Zhuoxu Construction (China), ne’ebé reprezentadu husi Sr. Xu Yongshou, responsável ba iha Munisipiu Bobonaro;
- Kompanhia Shandong Heijian Construction (China), ne’ebé reprezentadu husi Sr. Ren Yongjie, responsável ba Munisipiu Baucao;
- no Kompanhia Atunegos Unipessoal, Lda (Timor-Leste), ne’ebé reprezentadu husi Sr. Pedro do Santos Martins, responsável ba iha Munisipiu Ermera.
Iha okazisaun ne’e, Presidente Tribunal de Recurso, Dr. Afonso Carmona, hatete katak asinatura termu de aseitasaun ida ne’e mak selebrasaun husi kooperasaun kolektiva entre instituisaun governamentál no setor privadu, hodi ita hotu bele kontinua hamutuk atu labele iha violasaun sira iha servisu. Nia sublinha katak transparénsia, kooperasaun no kompromisu mak prinsipiu ezensiál atu garanti implementasaun projetu ne’e ho susesu.