Atividade ida-ne’e maka parte hosi esforsu governu no instituisaun estadu atu halo analize profunda ba Konstituisaun Timor-Leste, hodi konsidera aspétus ne’ebé presiza atualizasaun tuir dinámika dezenvolvimentu nasionál no nesessidade fortalesimento sistema demokrátika.
Durante semináriu, delegasaun Tribunal de Recurso fó kontribuisaun importante kona-ba perspetiva judisiál liu-liu iha interpretasaun prinsipius konstitusionál, impaktu revizaun ba administrasaun justisa, no garantia direitus fundamentais ba ema hotu.
Sua Exélensia Presidente Dr. Afonso Carmona subliña mos relevansia prosesu revizaun konstituisaun atu garante base legal ida ne’ebé sólida, adaptável no responde ba dezafiu atual no futuru.
Semináriu kona-ba Revizaun Konstitusionál, ne’ebé dezenvolve iha formatu interativu, iha objetivu prinsipál atu kria ambiente ida ne’ebé apropriadu ba promosaun reflexão kritika no saudável entre partisipantes sira. Através metode interativu ida-ne’e, semináriu refere atu fó espasu ba troka hanoin entre pares, hodi rekolla feedback husi parte interesada hotu-hotu kona-ba dezafius no obstákulu ne’ebé Konstituisaun 2002 hatama ba dezenvolvimentu ekonómiku-sosiál iha kontextu atual.
Alén disso, semináriu permite mos analiza oportunidade sira ba melloria ne’ebé bele surgi husi revisaun konstitusionál tuir mai, hodi garante katak Lei Fundamental da Repúblika bele adapta ba dinámika dezenvolvimentu nasaun no responde ba nesesidade jerasaun agora no gerasaun tuir mai.
Semináriu ida-ne’e envolve mos representasaun hosi ministerius governu, parlamentares, akademikus no instituisaun relevantes seluk, hodi knaar troka hanoin no valoriza kontribuisaun multisetoriál ba reforsu Lei Fundamental da Repúblika.