Iha loron 12 fulan Janeiru 2026, Sua Exelensia Presidente Tribunal de Recurso, Dr. Afonso Carmona, Sra. Mirela Maria Guterres Ribeiro (Espoza) no Membro do CSMJ Dra. Maria Natercia Gusmão Pereira partisipa iha serimónia Opening of the Legal Year (OLY) Singapore 2026, ne’ebé hala’o iha Singapura, hodi marka hahú Ano Judisiál 2026 no mos selebra Bisenténariu (tinan 200) husi sistema judisiáriu modernu Singapura.
Serimónia OLY Singapore 2026 nee maka momentu istóriku ida tanba komemora 200 tinan husi Estadu Direitu iha Singapura, hahú husi Segunda karta de Justisa iha tinan 1826. Iha okaziaun ne’e, Presidente do Supremo Tribunal de Singapura, Sua Exelensia Sundaresh Menon, lansa inisiativa sira ne’ebé importante, inklui medalha komemorativa no exibisaun públika ida ne’ebé sei hala’o tinan tomak hodi hatudu evolusaun no kontribuisaun sistema judisiáriu Singapura.
Iha diskursu ofisiál, Presidente do Supremo Tribunal mos subliña dezafiu prinsipal sira ne’ebé enfrenta sistema judisiáriu iha era modernu, inklui impaktu husi Inteligénsia Artifisial (IA) iha prosesu judisiál, no mos problema evasão advogadu sira iha profisaun jurídika. Hodi responde ba dezafiu sira ne’e, forma ona komité ida ne’ebé ko-lideradu husi Ministru da Justiça no Presidente do Supremo Tribunal, hodi dezenvolve politika no estratéjika atu garante kualidade, integridade no ezelénsia judisiál.
Serimónia nee mos marka partisipasaun internasionál husi lideransa judisiáriu husi nasaun oioin, inklui Supremo Tribunal Indonézia no Presidente Tribunal de Recurso Timor-Leste, Dr. Afonso Carmona, ne’ebé demostra relasaun no kooperasaun judisiáriu ne’ebé forte entre instituisaun tribunal sira iha rejiaun.
Iha mesma okaziaun, anunsia mos nomeasaun juízes internasionál foun ba Singapore International Commercial Court (SICC) ba tinan 2026, inklui Juiz David John Goddard no Sir Nigel Teare, hodi fortalece kapasidade tribunal ne’e iha resolusaun disputa komersial internasionál.
Além ne’e, Governu no Poder Judisiáriu Singapura lansa inisiativa SGLaw200, série atividade ao longo de tinan 2026 hodi envolve públiku no komunidade jurídika iha komemorasaun Bisenténariu, no mos abertu Programas Estágio do Serviço Judiciário ba tinan 2026 iha Supremo Tribunal, Tribunais Estaduais no Tribunal de Justiça da Família.
Partisipasaun Sua Exelensia Dr. Afonso Carmona iha eventu ne’e reflete kompromisu Tribunal de Recurso Timor-Leste hodi hametin relasaun institusionál, aprende esperiénsia internasionál, no kontinua promove dezenvolvimentu sistema judisiáriu nasional iha baze padraun globál.