Díli, 16 Janeiru 2026 – Sua Exelénsia Prezidente Tribunal de Recurso, Dr. Afonso Carmona, partisipa iha enkontru ho Komisaun F Parlamento Nasional, tuir konvite ne’ebé hato’o husi Parlamento, hodi diskute esbosu Projetu Lei kona-ba Adosaun.
Iha diskusaun ne’e, Sua Exelénsia Prezidente Tribunal de Recurso hateten katak adosaun laós buat foun ida, tanba desde ema moris adosaun iha ona iha sosiedade. Maibé, agora presiza iha lei ida ne’ebé klaru no forte hodi fasilita prosesu adosaun no proteje interese no direitu labarik sira nian.
Prezidente Tribunal de Recurso subliña katak lei adosaun ne’e tenke orienta ba interese populasaun nian, liu-liu proteksaun direitu labarik sira, no labele viola direitus umanus. Nia mos espera katak parte hotu-hotu bele hanoin ho matenek no objektivu hodi halo lei ida ne’ebé diak no justu ba ema hotu.
Iha nia rekomendasaun, Sua Exelénsia husu atu loke oportunidade ba parte hotu-hotu hodi bele fo sira nia opiniaun no kontribuisaun ba melloramentu Projetu Lei Adosaun. Nia hateten katak prosesu halo lei labele hare de’it husi parte ida nia hanoin, maibé presiza envolve parte hotu-hotu atu bele hetan konkluzaun ida ne’ebé diak liu no responde ba realidade sosiedade.
Enkontru diskusaun Projetu Lei Adosaun ne’e hala’o iha Salaun Enkontru GMPTL, Parlamento Nasional.