Díli, 21 Janeiru 2026 — Sua Exelénsia Presidente Tribunal de Recurso, Dr. Afonso Carmona, hamutuk ho Juíza Konselheira Dra. Maria Natércia no ekipa tékniku Câmara de Contas, iha loron Tersa (21/01/2026) apresenta ona parecer no relatóriu kona-ba Orsamentu Jeral Estadu tinan 2024 ba Parlamentu Nasional, liu husi Komisaun C.
Apresentasaun ne’e halo iha Parlamentu Nasional ho objetivu atu esplika no esklarese rezultadu avaliasaun Câmara de Contas kona-ba ezekusaun Orsamentu Estadu 2024. Iha apresentasaun ne’e, Sua Exelénsia Presidente Tribunal de Recurso no ekipa téknika esplika prosesu kontrolu, avaliasaun no audit ne’ebé halo ona ba atividade sira durante tinan 2024.
Baze relatóriu ne’ebé apresenta, atividade sira ne’ebé relatadu mak atividade rutineiru ne’ebé tinan-tinan hala’o iha Parlamentu Nasional, no instituisan estadu sira seluk, hodi garante katak ezekusaun orsamentu lao tuir planu no prinsípiu boa governasaun.
Câmara de Contas, hanesan parte husi Tribunal de Recurso, iha funsaun prinsipál atu halo kontrolu no audit ba ezekusaun finanseira estadu. Liu husi audit ne’e, Tribunal bele identifika atividade ruma ne’ebé la tuir planu, iha erru administrativu ka finanseiru, no mos situasaun sira ne’ebé presiza hadia.
Husi rezultadu audit sira ne’e, Câmara de Contas halo rekomendasaun ba entidade relevante sira atu halo koresaun no hadia falha sira ne’ebé identifika, hodi bele aumenta transparénsia no responsabilizasaun iha jestaun finanseira estadu.
Presidente Tribunal de Recurso: Audit Importante Atu Garante Responsabilizasaun
Iha intervista ho média, depois remata apresentasaun parecer no relatóriu Orsamentu 2024, Sua Exelénsia Presidente Tribunal de Recurso, Dr. Afonso Carmona, hatete katak apresentasaun ne’e importante tebes atu garante katak ezekusaun Orsamentu Estadu halo ho responsabilidade no tuir lei.
“Tribunal de Recurso, liuhosi Câmara de Contas, iha dever atu kontrola no halo audit ba ezekusaun orsamentu, atu hare atividade sira ne’ebé hala’o tuir planu ka lae. Se mosu erru ka deviasaun ruma, Tribunal sei fó rekomendasaun hodi hadia, atu garante boa jestaun finanseira estadu,” hatete Presidente Tribunal de Recurso.
Nia aumenta tan katak koperasaun entre Tribunal de Recurso no Parlamentu Nasional importante tebes atu fortalese sistema kontrolu no garante transparénsia iha utilizasaun orsamentu jeral do estadu