DILI, 27 janeiru 2021 –Prezidente Tribunál Rekursu (PTR), Deolindo dos Santos, hateten rezultadu auditoria hosi Câmara de Contas husu Governu labele foti osan hosi fundu kontijénsia tanba loloos ne’e atu responde situasaun urjénsia.
PTR ko’alia kestaun ne’e bainhira hala’o audiénsia públika ho Komisaun C (Finansa Públika). Iha audiénsia públika ho Prezidente Tribunál Rekursu, Deolindo dos Santos, akompaña hosi ekipa Auditoria hosi Câmara de Contas kona-ba apresiasaun Konta Jerál Estadu (KJE) 2019. Tanba KJE ne’e sempre halo diskusaun kada tinan molok tama ba aprezentasaun orsamentu tinan fiskál foun.
Durante audiénsia ne’e, Prezidente Tribunál Rekursu Deolindo esplika ba Komisaun C kona-ba difikuldade ne’ebé Governu enfrenta durante ezekusaun OJE 2019 nian.
Nune’e, PTR rekomenda ba Governu atu kumpre ezekusaun tuir lei ba provizaun orsamentu tuir mai.
“Ha’u fó de’it ezemplu rua iha relatóriu Câmara das Contas nian mak sei iha nafatin ezekusaun orsamentu 2019 ba programa sira-ne’ebé la prevee iha orsamentu maibé foti osan hosi fundu kontinjénsia, bainhira lei la permite tanba lei hateten fundu kontijénsia ne’e urjénsia la’ós para atu taka buat sira-ne’ebé la prevee iha orsamentu,” Deolindo dos Santos informa ba jornalista sira iha resintu Parlamentu Nasionál, kuarta ne’e.
Nune’e mós problema ne’ebé deskobre iha relatóriu ne’e viajen estranjeiru ne’e barak liu.
“Tanba kustu viajen iha tiha ona 100% maibé halo mós aditamentu ne’ebé tuir loloos labele halo,” nia dehan.
Prezidente Tribunál Rekursu ne’e fó-sai katak, Câmara de Contas hato’o rekomendasaun liu 100 ba Governu tenke kumpre.
Nia dehan, rekomendasaun kada tinan sempre fó hanoin ba Governu maibé la kumpre nafatin.
Entretantu Orsamentu Jerál Estadu (OJE) 2019 ho montante biliaun $1,482.
Jornalista: Evaristo Soares Martins
Editór: Cancio Ximenes