Díli, 27 de Marsu de 2026, S.E. PREZIDENTE TRIBUNAL DE RECURSO FO POSE BA DRA. ZULMIRA AUXILIADORA BARROS DA SILVA, BA DELIBERAÇÃO DO CONSELHO SUPERIOR DA MAGISTRATURA JUDICIAL, SOBRE A NOMEÇÃO DO JUÍZ SECRETÁRIO DO CONSELHO.
Sua Excelência Prezidente Tribunal de Recurso, Dr. Afonso Carmona, fó tomada de pose ba Dra. Zulmira Auxiliadora Barros da Silva atu exerce funsaun hanesan Juíza Sekretária do Conselho Superior da Magistratura Judicial iha rejime tempu parsial.
Serimónia tomada de pose ne’e realiza iha Díli, ho partisipasaun husi dirijente no funsionáriu sira iha área justisa, ne’ebé marka momentu importante ida iha esforsu atu haforsa instituisaun judisiáriu iha Timor-Leste.
Nomeasaun ida ne’e realiza tuir Deliberasaun husi Conselho Superior da Magistratura Judicial kona-ba nomeasaun Juíza Sekretária do Conselho, ne’ebé sai hanesan base legal ba desizaun refere. Iha kontestu ida ne’e, Sua Excelência Prezidente Tribunal de Recurso uza nia kompeténsia legal atu formaliza no konfirma nomeasaun ba Dra. Zulmira Auxiliadora Barros da Silva.
Durante serimónia, Sua Excelência Prezidente Tribunal de Recurso hato’o nia liafuan badak, ne’ebé subliña importánsia papel Conselho Superior da Magistratura Judicial nian hanesan órgaun responsável ba jestaun no disiplina magistradu judisiál sira. Nia mos destaca katak funsaun Juíza Sekretária iha papel importante iha apoiu tékniku no administrativu hodi asegura funsionamentu ne’ebé diak, transparente no efisiente ba órgaun refere.
Iha okaziaun hanesan, Dra. Zulmira Auxiliadora Barros da Silva mos hato’o nia liafuan badak, ne’ebé hatudu nia agradese ba konfiansa ne’ebé fó ba nia atu assume knaar ida ne’e. Nia reafirma nia kompromisu atu hala’o funsaun ho profesionalizmu, integridade no dedikasaun atu kontribui ba fortalese sistema judisiáriu iha Timor-Leste. Nomeasaun ida ne’e hatudu kompromisu kontinua husi instituisaun judisiáriu sira atu promove transparénsia, efisiénsia no fortalese Estadu de Direitu iha Timor-Leste