Iha loron 27 fulan Marsu 2026, Sua Exelénsia Prezidente Tribunal de Recurso, Dr. Afonso Carmona, partisipa iha enseramentu Formasaun Redes Básicas ba Funsionáriu Tribunais, ne’ebé realiza iha CNEFP Tibar.
Formasaun ne’e envolve formandu hamutuk ema na’in 13, ne’ebé fahe ba grupu rua. Grupu dahuluk kompostu husi formandu na’in 7, no grupu daruak kompostu formando na’in 6.
Iha diskursu, Sua Exelénsia Prezidente Tribunal de Recurso agradese tebes ba formador sira ne’ebé durante ne’e fó ona apoiu ba kapasitasaun funsionáriu Tribunais sira.hatete katak, durante mandatu, iha objetivu atu haforsa kapasitasaun funsionáriu sira atu la depende liu tan ba assesor estranjeiru.
Husu mos ba INAP atu fó atensaun liu tan ba formasaun funsionáriu sira, no espera katak programa hanesan ne’e bele kontinua iha futuru. Enfatiza katak importante tebes atu muda sistema dependénsia ba assesor internasionál no hare liu ba dezenvolvimentu rekursu umanu nasional.
Tuir mai, Sua Exelénsia hatete katak durante ne’e osan barak mak uza ba selu assesor internasionál. Tanba ne’e, iha intensaun atu diminui utilizasaun assesor no redireciona orsamentu ne’e ba programa formasaun, hodi kapasita juiz, ofisial justisa no funsionáriu sira hotu.
Iha diskursu seluk, Diretor-Geral Tribunal de Recurso mos agradese ba oportunidade ne’ebé fó ona, no hatete katak durante tinan barak, funsionáriu sira la hetan oportunidade ba formasaun. Nune’e, agradese tebes tanba agora sira bele partisipa iha programa importante ida ne’e. Agradese mos ba formador sira ne’ebé akompaña formandu sira to’o iha enseramentu.
Diretor TIC Timor mos fó nia apresiasaun, ho agradese ba Sua Exelénsia Prezidente Tribunal de Recurso no lideransa hotu ne’ebé fó konfiansa ba TIC Timor. Nia hatete katak, maski tempu formasaun semana ida deit la sufisiente atu domina tomak matéria, maibé formandu sira hatudu kapasidade diak atu suporta servisu iha instituisaun tribunál sira. Nia mos apresia dedikasaun formador sira ne’ebé fó tempu tomak atu hanorin partisipante sira.
Iha parte ikus, reprezentante formandu sira hato’o liafuan agradese, hatete katak durante semana ida ne’e sira aprende konseitu importante no fundamentál kona-ba redes no funsionamentu dispositivus sira. Sira espera katak koñesimentu ne’ebé hetan bele aplika iha servisu loron-loron.
Formandu sira mos hare formasaun ida ne’e hanesan motivasaun atu kontinua aprende liu tan, no sira sujere atu programa hanesan ne’e bele kontinua iha futuru. Iha remata, sira agradese ba formador sira no parte hotu ne’ebé kontribui ona ba susesu formasaun refere.