Iha loron 18 fulan Dezembro, Sua Exelénsia Presidente Tribunal de Recurso, Dr. Afonso Carmona, halo abertura ofisiál ba Jogu Amizade iha âmbitu Selebrasaun Tinan Judisiál Tribunais Timor-Leste ne’ebe halao iha kampo Futsal BOP Caicoli Dili
Jogu amizade ida ne’e ho objetivu atu hamoris relasaun diak, solidariedade no espíritu amizade entre magistradu no funsionáriu sira iha sistema judisiáriu, hodi mós promove saúde no uniaun entre instituisaun tribunais sira.
Atividade jogu amizade ne’e partisipa hosi ekipa ne’ebé kompostu husi feto no mane, ne’ebé mai hosi kada tribunal ida-idak, hanesan Tribunal de Recurso, Tribunal Judisiál Primeira Instánsia Dili, Baucau, Oé-Cusse, Suai, no Tribunal da Contas.
Iha diskursu abertura, Sua Exelénsia Presidente Tribunal de Recurso, Dr. Afonso Carmona, subliña katak jogu amizade la’ós de’it atividade desportiva, maibé sai mós hanesan dalan ida atu haburas espírito unidade, respeitu no kooperasaun entre tribunais sira, nudar parte husi esforsu atu hadia servisu justisa iha Timor-Leste.
Selebrasaun Tinan Judisiál Tribunais Timor-Leste sai hanesan momentu importante ida atu reflete kona-ba realizasaun no desafio sistema judisiáriu nian, no jogu amizade ne’e mós sai hanesan simbolu komitmentu tribunais sira ba unidade, harmonia no servisu ba justisa no povu Timor-Leste.