Díli, 23 Julho 2025 – Sua Exelénsia Presidente do Tribunal de Recurso, Dr. Afonso Carmona, ofisialmente lansa “Código Civil Timor-Leste Tetum no Anotado 2025” iha Serimónia solene ne’ebé hala’o iha edifísiu Tribunal de Recurso.
Serimónia importante ida ne’e markante ho partisipasaun honorável husi Sua Exelénsia Presidente da República, Dr. José Ramos-Horta, lideransa sira hanesan Procurador-Geral da República, membros do Governo, Membros do Parlamento Nacional – principalmenti Komisaun A, Juízes Conselheiros, Juízes Administradores, Juízes de Direito,Defensores no Advogados.
Publikasaun ida ne’e hetan apoio forte husi Ministerio da Justiça, ne’ebé hatudu nia konsiderasaun no apresiasaun boot ba importánsia “Código Civil Anotadu Tetum 2025” núdar instrumentu legal relevante iha fortalesimentu sistema judisiáriu no asesu ba lei iha lian nasional.
Preparasaun ba Serimónia lansamentu refere, realiza ho koordinasaun hamutuk ho Tribunal de Recurso no estrutura administrativa ne’ebé inklui Diretór Jerál, Diretór Nasionál, Chefes Departamentu no funsionáriu sira, ne’ebé kontribui ho dedikasaun atu garante dezenvolvimentu no organizasaun sussesu ba eventu ida ne’e.
Iha nia diskursu, Sua Exelénsia Dr. Afonso Carmona subliña katak publikasaun “Código Civil Tetum no Anotado 2025” mak atu fasilita asesu no komprensaun lei sira, liu-liu ba Juízes, Procuradores, Defensores Públicos, Dosente no Estudante Direito sira.
Nia hateten tan: “Kodigu Civil Anotadu Tetum ne’e lori ita lee ho klaru, la presiza fera ulun, hodi nune’e labele iha interpretasaun no opiniaun ne’ebé la hanesan. Palavra ‘anotadu’ signifika katak iha anotasaun no esplikasaun sira ne’ebé ajuda ita komprende kontestu legal sira ho fasiíl.”
Publikasaun ne’e sei sai referénsia esensial ba komunidade judisiáriu no akademika, no sei kontribui ba konsolidasaun Estado de Direitu no promosaun lian Tetum iha sistema justisa Timor-Leste.