Iha loron 25 fulan Jullu tinan 2025, Sua Exelénsia Dr. Afonso Carmona, Presidente Tribunal de Recurso, partisipa iha serimónia enseramentu formasaun teknika espesífika ba auditores nain lima husi Câmara de Contas, ne’ebé realiza iha edifísiu Tribunal Judisiál Primeira Instánsia Dili.
Formasaun refere hala´o iha loron lima nia laran, ho objetivu atu reforsa kapasidade profisionál auditores sira, liu husi partilla esperiénsia no metodolojia internasionál iha área auditoria.
Formasaun ne’e fó husi formadora internasionál nain rua: Sra. Markella Koukkoulli husi Cyprus no Sra. Jani Aulona husi Albania. Formadora sira ne’e kontribui ho dedikasaun boot, hodi partilla koñesementu prátiku relevante ba auditores sira iha Timor-Leste.
Durante serimónia enseramentu, Sua Exelénsia Presidente Tribunal de Recurso apresia kontribuisaun formadora sira no subliña importansia dezenvolvimentu kapasidade ba auditor sira nian iha sistema judisiál. Formadora sira mos Kontenti ho oportunidade atu kontribui ba prosesu formasaun no halo esperiénsia ida ne’ebé konsidera importante tebes.
Atu marka serimónia ne’e, partisipa husi Diretór Jerál Tribunal de Recurso, xefes Auditores husi Câmara de Contas, formadora no formandu sira.