Manatutu, 3 Setembru 2026 — Sua Exelénsia Presidente Tribunal de Recurso, Dr. Afonso Carmona, partisipa iha Serimónia Homenajen ba Monsenhor Martinho da Costa Lopes, ne’ebé hala’o iha Munisípiu Manatutu, iha loron 3 Setembru 2026.
Serimónia ne’e hala’o ho tema “O seu amor são o alicerce da nossa Igreja e da Pátria, o seu legado, uma luz eterna que nos guia”, nu’udar forma ida atu fó rekonesimentu ba legadu no kontribuisaun Monsenhor Martinho da Costa Lopes ba Igreja no Pátria.
Iha serimónia ne’e, partisipa mos Juíza Conselheira Dra. Jacinta Correia, Juízes Administradores husi Dili, Suai no Oe-Cusse, Diretór-Geral Tribunal de Recurso no Diretór Nasionál Tribunal de Recurso, hamutuk ho autoridade sira seluk no reprezentante husi Igreja no komunidade.
Serimónia homenajen ne’e hala’o hamutuk ho inaugurasaun Ponte Monsenhor Martinho da Costa Lopes, ne’ebé Governu no Estadu Timor-Leste fó naran hanesan forma ida atu perpetua memória, legadu no mensajen unidade ne’ebé Monsenhor Martinho da Costa Lopes husik ba povu Timor-Leste.
Iha intervensaun, Sua Exelénsia Presidente Repúblika, Dr. José Ramos-Horta, hatete katak Monsenhor Martinho da Costa Lopes mak figura importante ida ne’ebé fó kontribuisaun boot ba Igreja no mos ba luta povu Timor-Leste nian atu hetan liberdade no independénsia.
Tanba ne’e, Governu no Estadu Timor-Leste hili naran Monsenhor Martinho da Costa Lopes ba ponte ne’e, hodi perpetua nia legadu no mensajen unidade ba jerasaun sira tuir mai.
Presidente Repúblika subliña katak, iha tempu uluk, Monsenhor Martinho da Costa Lopes bele konsidera hanesan “ponte” ida ne’ebé liga ema no komunidade sira. Nia atravessa mota no fronteira, no iha tempu difísil, nia kontinua hametin relasaun ho ema hotu.
“Uluk, Monsenhor Martinho da Costa Lopes hanesan ponte ida. Nia hakat mota, hakat fronteira, hakat loron monu no loron sae. Nia hanesan ponte ida ba ema hotu-hotu. Agora, Ponte Manatutu lori nia naran atu kontinua nia legadu ne’ebé nia husik mai ita, mak unidade,” dehan Presidente Repúblika.
Dr. José Ramos-Horta mós hatete katak homenajen ne’e la’ós de’it atu fó naran ba infraestrutura, maibé nu’udar forma atu rekonhese Monsenhor Martinho da Costa Lopes nu’udar herói, lutadór, mestre no veteranu Igreja, ne’ebé fó kontribuisaun boot ba rai Timor-Leste durante luta ba liberdade.
Enkuantu ne’e, Bispu Dioseze Baucau, Dom Leandro Maria Alves, hatete katak Monsenhor Martinho da Costa Lopes bele konsidera nu’udar “ponte” ida ne’ebé lori lian povu Timor-Leste, liu liu lian husi sira ne’ebé sofre durante períodu okupasaun, ba komunidade internasionál.
Iha oportunidade hanesan ne’e, Presidente Autoridade Munisipál Manatutu, Luís Inácio Henrique Fernandes, hato’o nia agradese ba Governu no Estadu Timor-Leste tanba fó ona onra ba Monsenhor Martinho da Costa Lopes, ne’ebé konsidera nu’udar herói no figura importante ba povu Timor-Leste.