Iha loron 15 fulan Janeiru 2026, Sua Exelénsia Presidente Tribunal de Recurso, Dr. Afonso Carmona, partisipa iha Serimónia Tomada de Posse Presidente foun Conselho Administrasaun Instituto Nasional Seguransa Sosial (INSS) no Fundo de Reserva da Seguransa Sosial (FRSS) ba períodu mandatu 2026 to’o 2028, ne’ebé hala’o iha Salaun Ministério da Solidariedade Social, Díli.
Serimónia ida ne’e hala’o ho solene ho partisipasaun husi autoridade estadu, representante instituisaun públika no privada, Embaixador no konvidadu espesial sira, hodi marka inísiu ofisiál ba mandatu foun liderança INSS-FRSS nian.
Iha serimónia ne’e, autoridade sira hato’o importánsia papel INSS no FRSS iha garantia proteksaun sosial ba traballador sira no sustentabilidade sistema seguransa sosial iha Timor-Leste. Nomeasaun no tomada de posse lideransa foun sei fortalese governansaun, transparénsia no efisiénsia iha jestaun fundu seguransa sosial nian.
Partisipasaun Sua Exelénsia Presidente Tribunal de Recurso reflekte kompromisu poder judisiáriu hodi apoiu fortalesimentu instituisaun estadu sira, iha esforsu kontinua atu promove boa governansaun no estabilidade sosial no ekonómika.