Iha loron 30 fulan Dezembru 2025, Sua Exelénsia Presidente Tribunal de Recurso, Dr. Afonso Carmona, partisipa iha Missa Agradesimentu em homenagem aos Heróis Nasionais, ne’ebé hala’o iha Paróquia Metinaro.
Missa agradesimentu ida-ne’e hala’o ho objetivu atu fo respeitu, rekoñesimentu no agradesimentu ba sakrifísiu boot ne’ebé heróis nasionais sira halo hodi hetan ukun-rasik no libertasaun ba Pátria Timor-Leste. Iha selebrasaun relijioza ne’e, partisipa mos autoridade estadu sira, lideransa lokál, reprezentante institusionál sira, veteranu sira no komunidade Metinaro.
Depois husi Missa Agradesimentu, Sua Exelénsia Presidente Tribunal de Recurso, hamutuk ho autoridade sira seluk, kontinua ho serimónia deposisaun flores iha Jardim dos Heróis no Mártires da Pátria iha Metinaro, hanesan sinál respeitu no omenajen ba heróis sira ne’ebé halo sakrifísiu ba nasaun.
Partisipasaun Sua Exelénsia Presidente Tribunal de Recurso iha atividade ida-ne’e reflete kompromisu Tribunal de Recurso nian atu kontinua valoriza no fo honra memoria istórika heróis nasionais sira, nune’e sai inspirasaun ba gerasaun foun atu mantén valor patriotismu, Justisa no Estadu Direitu Demokrátiku iha Timor-Leste.