Iha loron 19 fulan Fevereiru 2026, Sua Exelénsia Prezidente do Conselho Superior da Magistratura Judicial, Dr. Afonso Carmona, partisipa iha Audiénsia Públika kona-ba proposta Segunda Alterasaun ba Lei Nú. 3/2004, loron 4 Abril, kona-ba Lei Partidus Polítikus.
Audiénsia refere hala’o iha Sala Konferénsia do Parlamento Nacional, ho partisipasaun husi Conselho Superior do Ministério Público no mós Conselho Superior da Magistratura Judicial.
Iha oportunidade ne’e, reprezentante sira halo análiza ne’ebé kle’an kona-ba proposta alterasaun ba lei refere, inklui revogasaun no mudansa ba artigu sira ne’ebé konsidera presiza atu ajusta ho realidade atual no dezenvolvimentu sistema polítiku no jurídiku nasaun nian.
Diskusaun ne’e fó espasu ba instituisaun sira atu hato’o sira-nia hanoin no rekomendasaun téknika, hodi garante katak alterasaun ba Lei Nú. 3/2004 bele responde ba nesesidade prátika no prinsípiu estadu de direitu demokrátiku.
Audiénsia públika ne’e hanesan parte husi prosesu lejislativu atu asegura transparénsia no partisipasaun instituisaun relevante sira iha elaborasaun lei.