Iha loron 17 fulan Marsu tinan 2026, Sua Exelénsia Prezidente Tribunal de Recurso, Dr. Carmona, hamutuk ho komitiva hala’o vizita ofisiál iha Suai.
Tuir mai, iha loron 18 no 19 fulan Marsu 2026, Sua Exelénsia no komitiva hala’o vizita ba Tribunal Judisial Primeira Instánsia Suai. Iha okaziáun ne’e, Sua Exelénsia realiza enkontru jerál ho juízes, ofisiáis de Justisa no funsionáriu sira.
Iha nia diskursu, Sua Exelénsia ko’alia kona-ba planu instalasaun Supremu Tribunal Justisa, no mós instalasaun Tribunal Judisial Primeira Instánsia iha munisípiu haat, mak hanesan Baucau, Viqueque, Ermera no Maliana.
Além de ne’e, Sua Exelénsia aborda mós kona-ba juízes sira ne’ebé servisu ona durante tinan 8 iha sistema judisiál, iha direitu atu partisipa iha konkursu ba instalasaun Supremu Tribunal Justisa refere. Nia hatete katak medida ida ne’e importante atu valoriza esperiénsia no dedikasaun juízes sira nian.
Koalia mos servisu ofisiál sira no kondisaun funsionáriu nian, inklui sistema saláriu no oportunidade promosaun. Funsionáriu sira ne’ebé tuir planu no preenxe rekizitu sira sei hetan oportunidade atu promove ba funsionáriu permanente, tuir regra jerál Funsaun Públika.
Objetivu husi vizita ne’e mak atu hare diretamente kondisaun servisu iha tribunal no halo sosializasaun kona-ba informasaun no planu sira ne’ebé sei implementa iha tinan ida ne’e no iha futuru.
Iha loron 19 fulan Marsu 2026, Sua Exelénsia no komitiva halo observasaun direta ba edifísiu Tribunal Judisial Primeira Instánsia Suai, inklui hare kondisaun sira iha parte balun ne’ebé presiza atu hadia, hanesan sala arkivu no sala objetu.
Tuir mai, Sua Exelénsia no komitiva visita mós edifísiu residénsia Juizes ne’ebé iha kondisaun abandonadu ka la uza. Kona-ba edifísiu residénsia refere, tuir planu sei halo reabilitasaun atu bele uza fila fali iha futuru.
Depois husi vizita ba edifísiu residénsia tribunal, Sua Exelénsia kontinua halo enkontru ba daruak ho juízes, ofisiáis no funsionáriu sira iha Tribunal Judisial Primeira Instánsia Suai.
Iha enkontru ne’e, Sua Exelénsia Prezidente, Dr. Carmona, hateten katak: “Hau lori to’o deit iha instalasaun Supremu Justisa, maibé bainhira iha oportunidade atu kontinua, hau sei kontinua nafatin hodi halo esforsu atu servisu sira bele lao ho diak.”
Dr. Carmona mós hateten nia espera katak juízes, ofisiáis no funsionáriu sira tenke servisu ho profesionalizmu no respeitu malu, no labele prejudika malu, atu bele hatudu ba públiku katak tribunal iha kapasidade no kredibilidade.
Ikus mai, Sua Exelénsia enfatiza katak instalasaun Supremu Tribunal Justisa sei realiza iha fulan Maiu tinan 2026, no sai hanesan etapa importante ida ba fortalesimentu sistema justisa iha Timor-Leste.