Iha loron 9 fulan Marsu tinan 2026, Sua Exelénsia Prezidente Tribunal de Recurso, Dr. Afonso Carmona, partisipa iha serimónia abertura formasaun kona-ba Redes Básicas ba funsionáriu tribunais sira. Serimónia refere realiza iha Centro Nacional de Emprego e Formação Profissional (CNEFP) Tibar.
Formasaun ne’e organiza liu husi área Teknolojia Informasaun no Komunikasaun (TIC) ho apoiu husi Instituto Nacional da Administração Pública (INAP), ho objetivu atu hasa’e koñesimentu no kapasidade funsionáriu tribunais sira iha área teknologia informasaun, liu-liu kona-ba sistema redes básicas.
Formandu sira hamutuk ema na’in 13, ne’ebé fahe ba grupu rua. Grupu dahuluk kompostu husi formandu na’in 7, ne’ebé hahú ona formasaun iha loron 9 fulan Marsu 2026. Enkuantu grupu daruak kompostu husi formandu na’in 6, ne’ebé planeia atu hahú formasaun iha loron 23 fulan Marsu 2026.
Iha nia diskursu abertura, Sua Exelénsia Prezidente Tribunal de Recurso husu ba formandu sira atu aproveita ho diak oportunidade formasaun ne’e no partisipa ho seriedade atu bele aumenta sira nia koñesimentu no kapasidade iha área teknologia moderna.
Dr. Carmona mos hateten katak durante ne’e Tribunal de Recurso sei uza servisu tekniku husi espesialista IT internasional, ne’ebé lori gastu orsamentu ne’ebé boot. Tamba ne’e, importante tebes atu dezenvolve rekursu umanu nasional sira liu husi formasaun hanesan ne’e, atu bele iha kapasidade teknika iha área teknologia informasaun.
Tuir nia hateten tan, ho dezenvolvimentu kapasidade ema Timor-Leste nian iha área teknologia, Tribunal bele diminui dependénsia ba espesialista estrangeiru no mos bele halo utilizasaun orsamentu Estadu sai efisiente liu.
Iha oportunidade ne’e, Dr. Carmona mos hato’o agradese boot ba área TIC no INAP ne’ebé servisu hamutuk atu realiza formasaun refere, ne’ebé sei ajuda funsionáriu tribunais sira aumenta koñesimentu iha teknologia moderna atu bele kontribui ba dezenvolvimentu no modernizasaun servisu tribunais iha futuru.