Prezidente Tribunal de Rekursu Partisipa iha Hand Over Site Projetu Konstrusaun Edifísiu Tribunal Judicial Primeira Instánsia Baucau

Baucau, 19 Janeiru 2026 — Sua Exelénsia Prezidente Tribunal de Rekursu, Dr. Afonso Carmona, partisipa iha serimónia Hand Over Site Project ba Konstrusaun Edifísiu Tribunal Judicial Primeira Instánsia Baucau, ne’ebé realiza iha Munisípiu Baucau.

Serimónia ne’e sai hanesan momentu historiku no signifikativu ida iha istória existénsia Tribunal no sistema justisa iha Timor-Leste, tanba hahú ezekusaun projetu konstrusaun edifísiu tribunal ida ne’ebé estratéjiku no importante iha rai laran.

Iha serimónia ida ne’e, partisipa mos husi Diretór-Jerál Tribunal de Rekursu, Diretór Kompania Shandong Hejiang Construction Group, Komandante PNTL Munisípiu Baucau, Reprezentante Prezidente Autoridade Munisípiu Baucau, Juíza Administradora Tribunal Judicial Baucau, Juíz Direitu, no convidadu seluk.

Objetivu husi serimónia hand over site ne’e mak entrega dokumentu ofisiál husi Sua Exelénsia Prezidente Tribunal de Rekursu ba kompania konstrutora Shandong Hejiang Construction Group, hodi fó sinal verde ba hahú prosesu ezekusaun projetu konstrusaun edifísiu tribunal.

Projetu konstrusaun edifísiu Tribunal Judicial Primeira Instánsia Baucau ne’e la’ós deit hanesan obra infraestrutura Estadu ida, maibé mos hanesan simbolu ida ba fortalesimentu Estadu no sistema justisa iha Timor-Leste. Konstrusaun edifísiu ida ne’e sei fó kondisaun servisu ne’ebé dignu, seguru no adekuadu ba juíz sira, prokuradór sira, advogadu sira no funsionáriu judisiál sira, hodi bele hala’o servisu justisa ho efisiénsia no profesionalizmu .

Iha diskursu, Sua Exelénsia Prezidente Tribunal de Rekursu hato’o deseju diak no enkoraja ba kompania Shandong Hejiang Construction Group atu bele hetan susesu iha ezekusaun projetu importante ida ne’e, no mos husu atu halo servisu tuir padraun tékniku, prazu no kualidade ne’ebé determina ona.

Ba povu Baucau, projetu ida ne’e sai hanesan parte ida husi vizaun Governu atu hametin sistema justisa no hasa’e kualidade servisu públiku iha rai laran. Governu espera katak komunidade no autoridade hotu iha Munisípiu Baucau sei fó apoiu no kolaborasaun ativa durante períodu ezekusaun no implementasaun projetu, hodi nafatin garante katak projetu bele remata ho susesu no fó benefísiu ba ema hotu.

Konstrusaun edifísiu Tribunal Judicial Primeira Instánsia Baucau espéra sei sai hanesan pilar importante ida ba justisa ne’ebé asesível, modernu no besik liu ba komunidade.

Depois de remata serimónia iha terenu projetu, Sua Exelénsia Prezidente Tribunal de Rekursu kontinua  ajenda servisu, halo vizita ba Edifísiu Tribunal Judicial Primeira Instánsia Baucau atual. Iha vizita ida ne’e, Sua Exelénsia hare diretamente kondisaun edifísiu tribunal ne’ebé uza hela, no mos halo interasaun ho funsionáriu judisiál sira atu rona situasaun no desafiu sira ne’ebé hasoru iha loron-loron.

Vizita ne’e reflete kompromisu lideransa Tribunal de Rekursu atu nafatin hadia kondisaun servisu no garante katak sistema justisa iha rai laran bele funsiona ho diak, efisiente no humanizadu, enkuantu hein realizasaun projetu konstrusaun edifísiu foun ne’ebé sei sai solusaun permanente ba nesesidade Tribunal iha Munisípiu Baucau.