BOBONARO (23 Janeiru 2026)– S.E. Presidente Tribunal de Recurso, Dr. Afonso Carmona, prezide serimónia entrega documentos (Hand Over Site Project) ba konstrusaun edifísiu foun Tribunal Judisiál Primeiru Instánsia (TJPI-Bobonaro). Edifísiu foun ne’e sei hari loloos iha Suku Holsa,Munisípiu Bobonaro.

Projetu ne’e ezekuta husi kompañia JIANGSU ZHUOXU HOLDING CONSTRUCTION COR,LTD(CHINA) IN JV With YOUGLING HOLDING UNIP, LDA TIMOR-LESTE, ho objetivu atu hametin kbiit instituisaun judisiária no fasilita kbiit komunidade nian hodi asesu ba justisa iha área refere.

Iha serimónia ne’e, Presidente Autoridade Munisípiu (PAM) Bobonaro, Sr. Paulo Moniz Maia, hato’o ninia apresiasaun boot ba Governu no Tribunal de Recurso. Iha ninia intervensaun, PAM dehan katak edifísiu foun ne’e sai hanesan símbolu modernizasaun no progresu ba povu Bobonaro, liuliu ba komunidade iha Suku Holsa.

“Ohin loron istóriku ida ba ita-nia munisípiu. Ho edifísiu foun ne’ebé dignu, ba  povu Bobonaro sei sente katak estadu duni mak hakbesik an ba sira hodi buka justisa. Ami simu projetu ne’e ho liman rua no hato’o agradesimentu ba konfiansa ne’ebé fó mai ami,” hateten Sr. Paulo Moniz Maia.

Iha parte seluk, Diretór Jerál Tribunal de Recurso, Sr. Cipriano Sarmento da Costa Lopes, mós hato’o ninia intervensaun hodi subliña importánsia husi kolaborasaun institusionál. Nia emfatiza katak susesu projetu ne’e depende ba kooperasaun ne’ebé metin ho entidade hotu.

“Serbisu hamutuk ho autoridade munisípiu no autoridade kompetente sira seluk, liuliu liña ministeriál ne’ebé relevante, sai xave fundamentál ba ita. Ami presiza kordenasaun ne’ebé di’ak atu garante katak buat hotu la’o tuir planu no kumpri kualidade ne’ebé estadu hakarak,” Sr. Cipriano Sarmento da Costa Lopes.

Hosi parte ezekutór, Diretór Kompañia Jiangsu Zhuoxu Holding Construction Cor,Ltd (China) In Jv With Yougling Holding Unip, Lda Timor-Leste,iha ninia intervensaun, kompromete an katak sira sei hala’o serbisu ho profisionalizmu másimu. “Ami kompromete ona atu termina projetu ne’e tuir prazu ne’ebé hakerek iha kontratu laran, no ho kualidade ne’ebé di’ak tebes hodi servi interese justisa nian iha Bobonaro,”

Segundo Komandante PNTL Munisípiu Bobonaro, Superintendente Asistente José Casamiro de Carvalho mós fó ninia garantia ba kestaun seguransa durante prosesu konstrusaun la’o iha Suku Holsa. Nia subliña katak estabilidade mak xave prinsipál ba susesu projetu ne’e.

“Ami hosi parte PNTL nian prontu atu fó kooperasaun másimu. Ami sei garante seguransa iha área ne’e hodi kompañia bele serbisu ho hakmatek,” afirma Segundo Komandante.

Serimónia ne’e hetan mós akompañamentu husi Direitór Terras e Propriedades, Direitór Obras Públikas, Direitór ADN, no Direitór Agrikultura, Floresta no Pescas. Prezensa estrutura téknika sira-ne’e hodi asegura katak aspetu hotu, husi rai to’o infraestrutura, kordenadu ona ho di’ak. Komunidade lokál husi Suku Holsa mós partisipa ho haksolok hodi hein remata projetu ne’ebé sei fasilita sira-nia direitu ba justisa.