Iha loron 16 Outubru 2025, Parlamentu Nasionál hato’o konvite ba Sua Exelência Presidente Tribunal de Recurso, Dr. Afonso Carmona, hamutuk ho xefes Auditoria Câmara de Contas, partisipa iha Semináriu Nasionál “Panorama Orsamental 2026”, ne’ebé hala’o iha Ministériu das Finansas, Díli.
Atividade importante ida ne’e objetivu atu analiza no diskute perspetiva orsamental ba tinan fiskál 2026, nune’e fo oportunidade ba orgaun de soberania, entidade estadu, no setor relevante sira atu partilla hanoin no rekomendasaun kona-ba planeamentu, transparénsia no jestaun finanseira públika.
Iha semináriu refere, hetan partisipasaun husi Sua Exelência Prezidente Parlamentu Nasionál, membru Governu, reprezentante Banku Sentral de Timor-Leste (BCTL), no organizaun sosiedade sivil, hanesan sinal kompromisu konjuntu atu promové boa governansaun no responsabilidade públika.
Iha okaziaun ne’e, Sua Excelência Dr. Afonso Carmona sai hanesan orador prinspál, ho aprezentasaun ne’ebé fó enfase ba aspéktu jurídiku, institusionál no papel Tribunal de Recurso iha monitorizasaun no fiskalizasaun finansas públikas.
Nia sublinña mos importánsia kooperasaun efetivu entre Tribunal de Recurso, Câmara de Contas, Parlamentu Nasionál, Ministériu das Finanças, no instituisaun relevante seluk, atu garanti transparénsia, integridade no responsabilidade iha jestaun orsamental.
Hetan partisipasaun husi membru Parlamentu Nasionál, reprezentante instituisaun hotu estadu nian soberania, tekniku Ministériu das Finansas, tekniku husi banku sentral de timor-leste (BCTL), no observadór sira husi setor sivíl.
Atividade ne’e konsidera importante tebes iha kuadru preparativu Orsamentu Jeral Estadu (OJE) ba tinan fiskál 2026, hanesan parte husi esforsu Governu no Parlamentu Nasionál atu promové transparénsia, efisiénsia no boa governansaun finanseira iha Timor-Leste.