S.E. PREZIDENTE TRIBUNAL DE RECUSRO PARTISIPA IHA REUNIÃO EXTRAORDINÁRIA DO CONSELHO GERAL DO CENTRO DE FORMAÇÃO JURÍDICA E JUDICIÁRIA. (CFJJ).

Iha loron 13 Marsu 2026, Sua Excelénsia Prezidente husi Tribunal de Recurso, partisipa iha Reunião Extraordinária do Conselho Geral do Centro de Formação Jurídica e Judiciária (CFJJ), ne’ebé realiza ho objetivu atu diskute no avalia asuntu estratéjiku sira relasiona ho dezenvolvimentu no fortalesimentu sistema formasaun jurídika no judisiária iha Timor-Leste.

Reunião extraordinária ne’e realiza ho prezensa membru sira husi Conselho Geral, ne’ebé hamutuk halo troka hanoin no kontribui ho rekomendasaun sira atu garante implementasaun programa formasaun ne’ebé efetivu no kualitativu ba magistradu sira, ofisial justisa no profisionál sira seluk ne’ebé servisu iha setor judisiáriu.

Iha oportunidade ne’e, Sua Excelénsia Prezidente Tribunal de Recurso hateten katak Centro de Formação Jurídica e Judiciária iha papel estratéjiku tebes iha prosesu formasaun no kapasitasaun rekursu umanu sira iha área justisa. Tanba ne’e, presiza kontinua hametin koordenasaun no kooperasaun entre instituisaun sira relevante atu garante katak programa formasaun sira ne’ebé implementa bele responde ba nesesidade real sistema judisiáriu nian.

Iha reunião ne’e mos diskute no analiza matéria importante sira relasiona ho planeamentu programa formasaun, avaliasaun atividade sira ne’ebé hala’o ona, no mos estratéjia sira atu hasa’e kualidade no efisiénsia iha prosesu formasaun jurídika no judisiária iha futuru.

Ho hala’o reunião extraordinária ida ne’e, espera katak deliberasaun no rekomendasaun sira ne’ebé resulta husi diskusaun membru sira bele fó kontribuisaun signifikativu ba fortalesimentu kapasidade instituisaun judisiária sira no mos ba dezenvolvimentu sistema justisa ida ne’ebé forte, profisionál no kredível iha Timor-Leste.