DÍLI, 12 Janeiru 2026 – Excelentíssimo Diretor Geral Tribunal de Recurso, Sr. Cipriano Sarmento da Costa Lopes, partisipa iha Serimónia Hand Over Site Project ba projetu Konstrusaun Edifísiu Tribunal Judisiál Primeira Instánsia Ermera, ne’ebé hala’o iha Munisípiu Ermera suku Talimoro.

Iha serimónia ne’e, Excelentíssimo Diretor Geral Tribunal de Recurso entrega dokumentu hand over site ba Kompanhia Atunegos Unipessoal, Lda, hanesan kompania responsável ba ezekusaun projetu konstrusaun edifísiu tribunal refere.

Serimónia hand over site ne’e mos partisipa husi Sua Exelénsia Presidente Autoridade Munisípiu Ermera, Diretor Kompanhia Atunegos Unipessoal, Lda, Komandante PNTL Munisípiu Ermera, Diretor Obras Públiku, Diretor Agrikultura no Diretor Terras no Propriedade, ho partisipasaun husi  relevante sira seluk.

Iha diskursu konkluzaun, Excelentíssimo Diretor Geral Tribunal de Recurso agradese ba partisipante hotu nia presensa no suporta, no mos deseja katak projetu ida ne’e bele la’o ho susesu di’ak durante prosesu ezekusaun. Projetu ne’e konsidera hanesan projetu importante ida ne’ebé sei fó kontribuisaun boot ba hametin sistema justisa no funsaun públika iha Munisípiu Ermera.

Serimónia ne’e sai hanesan momentu historiku no signifikativu ida iha istória existénsia Tribunal no sistema justisa iha Timor-Leste, tanba hahú prosesu ezekusaun projetu konstrusaun edifísiu Tribunal ne’ebé estratéjiku no importante iha rai laran.

Objetivu prinsipal husi serimónia hand over site ne’e mak entrega dokumentu ofisiál husi , Excelentíssimo Diretor Geral Tribunal de Recurso ba kompania konstrutora, hodi fó sinal verde ba hahú prosesu konstrusaun edifísiu Tribunal Judisiál Primeira Instánsia Ermera. Projetu ne’e la’ós deit hanesan obra infraestrutura Estadu ida, maibé mos hanesan simbolu fortalesimentu Estadu no sistema justisa iha Timor-Leste.

Konstrusaun edifísiu Tribunal ida ne’e sei fó kondisaun servisu ne’ebé dignu, seguru no adekuadu ba juíz sira, prokuradór , advogadu  no funsionáriu judisiál sira, hodi bele hala’o servisu justisa ho efisiénsia, transparénsia no profesionalizmu.