Iha loron 19 fulan Dezembro 2025, realiza Sessão Solene Tinan Judisiál Tribunais Timor-Leste ho tema “Evolusaun no Perspetiva Sistema Jurídiku Timor-Leste”, ne’ebé hala’o iha Tribunal Judisiál Primeira Instánsia de Dili.
Sessão solene ne’e hahú ho introdusaun no saudasaun boas-vindas husi Sua Exelénsia Presidente Tribunal de Recurso, ne’ebé iha diskursu abertura subliña importánsia momentu ida ne’e nudar espasu reflesaun kona-ba dezenvolvimentu iha realizasaun sistema jurídiku Timor-Leste.
Tuir mai, realiza intervensaun husi Presidente Conselho de Gestão no Disciplina da Advocacia, Dr. Nelinho Vital, ne’ebé ko’alia kona-ba papel no kontribuisaun advogadu sira iha administrasaun justisa no garantia ba direitu sidadaun sira.
Defensor Públiku Geral, Dr. Cancio Xavier, iha mós intervensaun kona-ba papel defensor públiku sira iha asesu ba justisa, liuliu ba komunidade ne’ebé presiza proteksaun no asisténsia jurídika.
Sessão solene ne’e kontinua ho intervensaun husi Sua Exelénsia Procurador-Geral da Repúblika, Dr. Nelson de Carvalho, ne’ebé esplika papel Ministério Públiku nian iha prosesu no defende legalidade iha Estado de Direitu.
Iha parte ikus, Sua Exelénsia Presidente Tribunal de Recurso, Dr. Afonso Carmona, hato’o diskursu kona-ba evolusaun sistema judisiáriu no perspetiva futuru, hodi hamoris kompromisu institusionál ba independénsia, profisionalizmu no efisiénsia tribunais sira.
Sessão solene remata ho intervensaun husi Sua Exelénsia Presidente da Repúblika Democrátika de Timor-Leste, Dr. José Ramos-Horta, au mezmu tempu halo abertura ba ano judisial 2026, no mos apresia servisu sistema judisiáriu nian no hamutuk hato’o orientasaun ba fortalesimentu Estado de Direitu iha nasaun.
Depois remata serimónia solene, atividade kontinua ho distribuisaun prémios ba manán nain sira husi Jogu Amizade Tribunais, nudar parte husi selebrasaun Tinan Judisiál, ho objetivu atu hamoris unidade, espírito desportivu no kolezialidade entre tribunais sira iha Timor-Leste.