St. Petersbug, 25 Juñu 2026 — Sua Exelénsia Presidente Tribunal de Recurso, Dr. Afonso Carmona, partisipa iha konferénsia internasionál ho tema “Enforcement Agencies Adapting to New Realities”, ne’ebé hala’o iha Justice Quarter, Conference Hall E11.
Konferénsia ne’e realiza iha forma meza redonda ho xefe autoridade estranjeira sira (Heads of Foreign Authorities/Organizations) ne’ebé responsavel ba ezekusaun desizaun tribunal, ho partisipasaun husi instituisaun judisiál no organizasaun relevante internasionál sira.
Iha atividade ne’e, Tribunal de Recurso Timor-Leste partisipa nu’udar observador, hodi observa, aprende no kompriende dezenvolvimentu no inovasaun iha mekanizmu ezekusaun judisiál iha nivel internasionál, nune’e mos oportunidade hodi hametin kooperasaun.
Diskusaun ne’e modera husi Vladimir Gureev, Vice-Reitor ba Siénsia no xefe Departamentu Prosedura Sivíl, Atividade Lei Públika no Organizasaun Servisu Bailiff nian husi Russian State University of Justice (RPA of the Ministry of Justice of Russia).
Durante diskusaun, partisipante sira analiza kona ba nesesidade moderniza mekanizmu ezekusaun judisiál iha konteksu transformasaun dijitál, globalizasaun espasu jurídiku no reforma lejislativa ne’ebé kontinua akontese.
Asuntu sira ne’ebé diskute inklui oinsá mudansa sosial-ekonómika no teknolojia bele kontribui ba hadia sistema ezekusaun, oportunidade no risku husi implementasaun inteligénsia artifisiál (AI) iha prosesu ezekusaun judisiál, no modelu kooperasaun entre jurisdisaun sira iha konteksu lei internasionál .
Iha Oportunidade refere, Sua Exelénsia presidente Tribunal Supremu Cuba no Sua Exelénsia Presidente Tribunal de Recurso Timor-Leste Hasoru malun no hasai foto hamutuk , hanesan simbolu ida ba hametin koperasaun entre Instituisaun judisiária sira.
Hanesan Estatutu nudar observador, Tribunal de recurso Timor-leste kontinua fortifika relasaun no koperasaun judisial ho Tribunal sira iha nivel internasional.
Depois de diskusaun remata, Sua Exelénsia Presidente Tribunal de Recurso Dr. Afonso Carmona, simu konvite hodi partisipa iha eventu kultural “Evening ‘The St. Petersburg Seasons’ Art Cocktail Event”, ne’ebé hala’o iha Yelagin Island, Federation Russia.
Iha momentu simbóliku ida ne, Sua Exelénsia entrega símbolu tradisional Timor-Leste husi Uma Lulik (Uma Adat/Lulik) ba delegasaun husi Ministério da Justiça da Federação Russia, hanesan sinal amizade, respeitu no kooperasaun entre nasaun rua.
Gestu ne’e reflete kultura Timor-Leste iha valorizasaun ba relasaun diplomátika no amizade internasionál, liu-liu iha área justisa no kooperasaun Internasional.