Iha loron 21 fulan Maio tinan 2026, Sua Exelénsia Prezidente da Repúblika Democrátika Timor-Leste vizita ba preparasaun instalasaun Tribunal Supremu Justisa iha edifísiu antigu Tribunal Primeira Instánsia Díli.
Iha diskursu , Sua Excelénsia Prezidente Tribunal de Recurso, Dr. Afonso Carmona, hateten katak vizita ida ne’e importante tebes ba dezenvolvimentu setor justisa iha Timor-Leste. Nia hateten mos katak instalasaun Tribunal Supremu Justisa nu’udar etapa importante ida ne’ebé durante tempu naruk povu Timor hein hela.
Tuir nia hateten, Tribunal Supremu Justisa tenke estabelese ona atu kompleta estrutura judisiál ne’ebé previstu ona iha Konstituisaun Repúblika Demokrátika Timor-Leste. Iha oportunidade ne’e, Prezidente Tribunal de Recurso mos hato’o agradese ba Governu no entidade relevante sira ne’ebé fó apoiu durante prosesu preparasaun instalasaun Tribunal Supremu Justisa.
Iha diskursu seluk, Sua Exelénsia Prezidente Repúblika Demokrátika Timor-Leste hato’o agradese ba komisaun Instaladora no ba Prezidente Tribunal de Recurso tanba iha tempu badak konsege realiza ona servisu barak.
Prezidente Repúblika hateten katak tuir Konstituisaun no lei vigora sira, preparativu legal ba implementasaun Tribunal Supremu Justisa lao tuir dalan loos atu realiza dispozisaun ne’ebé hakerek ona iha Konstituisaun. Nia mos subliña katak Prezidente Tribunal de Recurso, Dr. Afonso Carmona, servisu ho dedikasaun no esforsu boot durante tempu badak hodi realiza preparasaun importante sira ba instalasaun Tribunal Supremu Justisa.
Sua Exelénsia Prezidente Repúblika mos hateten katak prosesu rekrutamentu ba júri sira atu halo selesaun lao ona tuir prosedimentu ne’ebé loos. Aleinde ne’e, preparasaun infraestruturas mos lao di’ak no iha tempu badak konsege hadia edifísiu ne’e atu bele funsiona ho kondisaun mínimu ne’ebé konfortável no apropriadu ba juízes, prezidente no funsionáriu sira seluk ne’ebé sei servisu iha Tribunal Supremu Justisa.
Sua Exelénsia Prezidente Repúblika reafirma katak bainhira simu pose nu’udar Prezidente Repúblika, prioridade ida mak atu harii Tribunal Supremu Justisa tuir Konstituisaun. Nia hateten mos katak durante nia mandatu sei kontinua kumpri Konstituisaun, inklui realizasaun instituisaun Tribunal Supremu Justisa ne’ebé temi ona iha lei inan nasaun nian.
Tuir planu ne’ebé estabelese, instalasaun Tribunal Supremu Justisa konsidera nu’udar objetivu importante ida atu bele realiza antes remata fulan Novembru tinan 2026.