Sua Exelénsia Prezidente Tribunal de Recurso Partisipa no Hato’o Diskursu iha 13th Meeting of the Council of ASEAN Chief Justices iha Thailand.

Thailand, 22 de Jullu de 2026 – Sua Exelénsia Prezidente Tribunal de Recurso, Dr. Afonso Carmona, hamutuk ho delegasaun husi Tribunal de Recurso, partisipa iha 13th Meeting of the Council of ASEAN Chief Justices (CACJ), ne’ebé realiza iha InterContinental Bangkok, Thailand.

Enkontru anual ida-ne’e halibur hamutuk Prezidente Supremu Tribunál sira Ka Juízes Máximos husi nasaun membru ASEAN atu reforsa kooperasaun judisiál no hametin relasaun entre instituisaun judisiáriu sira iha rejiaun. Iha reuniaun ne’e, lideransa judisiál sira halo diskusaun kona-ba dezenvolvimentu sistema justisa, troka esperiénsia di’ak liu, no buka dalan atu aumenta efisiénsia, independénsia no asesu ba justisa ba povu iha nasaun membru sira.

Durante reuniaun ne’e, Sua Exelénsia Prezidente Tribunal de Recurso hato’o diskursu ida ne’ebé subliña importánsia kooperasaun entre tribunál sira iha ASEAN atu hametin Estadu de Direitu, independénsia poder judisiáriu no dezenvolvimentu kapasidade instituisaun judisiál sira. Iha nia intervensaun, Sua Exelénsia mos reafirma kompromisu Tribunal de Recurso Timor-Leste atu kontinua partisipa ativamente iha inisiativa sira ne’ebé promove troka koñesimentu, inovasaun no prátika di’ak sira entre poder judisiáriu iha rejiaun.

Diskursu ne’e mos destaka katak kooperasaun rejionál iha área judisiáriu sai elementu importante atu hasoru dezafiu sira ne’ebé sistema justisa enfrenta iha tempu atual, liuliu kona-ba transformasaun dijitál, asesu igual ba justisa, no fortalese konfiansa públika ba instituisaun judisiáriu sira. Nune’e, kolaborasaun entre Tribunál Máximus ASEAN sei kontribui ba kriasaun sistema judisiáriu ida-ne’ebé modernu, transparente, efisiente no responsivu ba nesesidade sosiedade nian.

Partisipasaun Tribunal de Recurso iha 13th Meeting of the Council of ASEAN Chief Justices reflete kompromisu kontínuu Tribunal de Recurso República Democrática Timor-Leste atu haburas relasaun institusionál ho tribunál sira iha rejiaun ASEAN, hametin diplomasia judisiál, no kontribui ativamente ba dezenvolvimentu kooperasaun judisiáriu rejionál atu promove justisa, Estadu de Direitu no paz sustentável.