DILI, 21 jullu 2021 (TATOLI)—Tribunál Distritál Dili (TDD), kontinua rona testemuña-sira ba kazu produsaun Billete Identidade (BI), sertidaun Repúblika Demokrátika Timor-Leste (RDTL sígla portugés), ho kartaun eleitorál falsu.
Prosesu julgamentu ho númeru nuc.0044/19.PCCIC, kontra arguida ho inisiál FSC, nu’udár membru Polísia Nasionál Timor-Leste (PNTL), tanba halo dokumentu falsu ba ema atu asesu ba seguransa sosiál hosi Ministériu Solidariedade Sosiál no Inkluzaun (MSSI).
Tuir faktu, akuzasaun hosi Ministériu Públiku (MP), iha indísiu sufisiente katak, arguida FSC hahú iha 01 fevereiru to’o juñu 2019, serbisu iha Grupu Média Nasionál Televizaun (GMNTV), asumi kargu nu’udár koordenadór Jerál GMN security.
Iha 2019, administrasaun GMN, anunsia ba traballadór security GMN katak, tenke submete kopia dokumentu hanesan sertidaun RDTL, kartaun eleitorál no billete identidade atu halo kompletu sira-nia kontratu no mós trata seguransa sosiál.
Arguida rona tiha anunsiu ne’e, foti desizaun katak, nia mak ba trata rasik membru security sira-nia dokumentu sertidaun RDTL, kartaun eleitorál no BI.
Arguida aproveita situasaun ne’e hodi husu ba pesoa seguransa, hodi intrega identifikasaun, fotografia no osan minimu $10, másimu $20 kada ema hodi selu arguida.
Arguida mós hateten ba pesoál seguransa-sira, katak nia iha família ka nia kuñese funsionáriu ne’ebé mak serbisu iha notariadu, katak, bainhira liu hosi nia taratamentu dokumentu ne’e bele sai lalais, tanba fiar ba arguida.
Hafoin identifikasaun, fotografia hosi pesoál seguransa, arguida hahú produs rasik dokumentu falsu pertense ba pesoál hamutuk na’in -10.
Hafoin produs entrega ba pesoál seguransa hodi submete ba adminitrasaun GMN Holding, iha Bebora – Dili.
Durante arguida produs dokumentu falsu, nia rasik mak asina dokumentu-sira no maioria asinatura iha kartaun eleitorál ho BI hanesan de’it.
Dokumentu ne’ebé pertanse ba pesoál-sira hanesan sertidaun RDTL, BI no kartaun eleitorál, maioria falsu ho númeru asentu hanesan ho ema seluk nian.
Iha 14 fevereiru 2020, Polísia Sientífika Investigasaun Kriminál (PSIK), efetua buska domisiliár no apreensaun, iha arguida nia rezidénsia iha Dili, enkontra dokumentu BI (dokumentu totál lima), sertidaun RDTL (dokumentu totál hitu), kartaun eleitorál (dokumentu totál 16) pertense ba individu-sira iha leten no hosi produsaun falsu hirak ne’e arguida hetan $130.
Arguida perfeitamente hatene katak, dokumentu sira-ne’e bele emite de’it hosi instituisaun no mós funsionáriu ne’ebé iha kompeténsia no dokumentu sira nu’udár dokumentu públiku.
Maski nune’e, arguidu hakarak ho konsiénsia no livre deliberadamente ho intesaun atu benefisia nia-an no prezudika fé públika hodi kontinua produs.
Antes ne’e arguida serbisu iha GMN no nia hatene didi’ak katak, hahalok ne’e kontra lei no bele hetan kastigu ba maibé la hapara hahalok kriminál ne’e, hodi hamosu avaliasaun hanesan temi iha leten.
Ho faktu refere, arguida iha konkursu ho krime prátika falsifikasaun agravada iha artigu 304 númeru 1 kódigu penál.
Antes ne’e mós Tribunál rona deklarasaun arguida nian no liuhosi audiénsia julgamentu kontinuasaun, sasin ho inisiál GQ nu’udár membru seguransa rekoñes katak, loos duni momentu ne’ebá laiha BI, no fó duni osan ba arguida hosi prosesa, maibé nia hakfodak bainhira sistema Governu la simu nia naran.
“Ami-nia koordenadór prosesa lalais hodi fó ami nia-naran no ha’u nian trata de’it BI, laiha foto, maibé ikus rona dehan dokumentu falsu,” nia hateten iha sala audiénsia TDD Mandarin, kuarta ne’e.
Nune’e mós sasin AM, hateten momentu ne’ebá arguida husu ba sasin-sira atu fó naran, nune’e nia mak rezolve dokumentu maibé tenke selu $20 no nia parte atu trata BI ho sertidaun RDTL, fó de’it $10 ba arguida.
Rona tiha deklarasaun hosi parte-sira, Tribunál adia ba 02 agostu 2021, tuku 15:00 otl, hodi rona tan sasin seluk.
Audiénsia julgamentu ne’e prezide hosi juiz koletivu, Ana Paula, Maria Solana, Ivan Antonino, Ministériu Públiku reprezenta prokuradora Lidia Soares, no arguida hetan asisténsia legál hosi defensór públiku, Afonso de Jesus.
Jornalista: Nelson de Sousa