Suai, 18 Marsu 2026 — Médiku espesialista no Médiku destakadu sira iha Tribunal de Rekursu halo tratamentu saúde ba juízes, ofisiál justisa no funsionáriu sira iha Tribunal Judisiál Primeira Instánsia Suai.
Bazeia ba Despaxu Presidente Tribunal de Rekursu, Nº 6/2026, kona ba akompañamentu médiku, Tribunal de Rekursu liu husi Diresaun Nasional Rekursu Umanu hamutuk ho pessoal Médiku halao programa tratamentu saúde ba Juizes, Ofisiais Justisa no Funsionariu Públiku.
Atividade ne’e la’ós de’it ba juízes, ofisiál justiça no funsionáriu sira, maibé inklui mos Sua Exelénsia Prezidente Tribunal de Rekursu, tuir Despaxu N.º 06/2026 kona-ba akompañamentu médiku.
Despaxu refere katak akompañamentu médiku ne’e inklui konsultas, exames diagnostikus, tratamentu, internamentu no referénsia médika, ba Prezidente Tribunal de Rekursu, juízes, ofisiál justisa, funsionáriu públiku sira no mos sira-nia família, tuir lei ne’ebé vigora.
Medida ida ne’e bazeia ba direitu fundamentál atu hetan protesaun saúde, ne’ebé konsagra iha artigu 57 husi Konstituisaun Repúblika Demokrátika Timor-Leste. Governu iha responsabilidade atu asegura asesu ba kuidadu saúde ba sidadaun sira, tuir konstituisaun no lejislasaun aplikável.
Aleinde ne’e, inisiativa ida ne’e konsidera mos Lei Orgánika Sistema Judisiál no estatutu magistradu, ofisiál justisa no funsionáriu sira, ho objetivu atu garante kondisaun saúde ne’ebé di’ak hodi asegura dezempeñu funsaun públika no judisiál ne’ebé efisiente.
Importante liu tan, programa tratamentu saúde ida ne’e la’ós de’it realiza iha Suai, maibé planeadu atu abranje mos ba Tribunal Judisiál Primeira Instánsia sira hotu iha teritóriu Timor-Leste. Inisiativa ida ne’e hodi garante katak benefísiu saúde ne’e bele hetan hosi profisionál sira iha setor justisa iha área hotu, la hare de’it iha fatin espesífiku.
Prezidente Tribunal de Rekursu, Dr. Afonso Carmona, Hatete importánsia husi Programa “ Saúde no moris di’ak husi ami nia funsionariu sira ho sira nia familia hanesan fundamentál ba funsionamentu diak Tribunal nian. Asaun preventiva ne’e hanesan dalan ida hodi valoriza no tau matan ba ema hotu ne’ebe kontribui ba justisa iha Timor-Leste”
Programa ne’e hetan akollimentu di’ak husi partisipante hotu-hotu, ne’ebe apresia oportunidade atu tuir exame ho maneira prátiku no asesivel, hodi hametin Tribunal nia kompromisu ba saúde husi ninia membru no sira nia familia. Tribunal de Rekursu liu husi Diresaun Nasionál Rekursu Umanu reafirma ninia kompromisu ba asaun preventiva no kuidadu saúde, planeia atu implementa programa sira ne’ebe hanesan iha unidade jurisdisionál sira seluk. Programa ne’e sei kontinua kada fulan tolu, hodi garante monitorizasaun regular ba saúde no ba mos benefisiáriu sira hotu.