Iha loron 14 fulan Abril tinan 2026, Sua Exelénsia Presidente Tribunal de Recurso, Dr. Afonso Carmona, partisipa iha reuniaun ordinária Conselho de Coordenação para a Justiça, ne’ebé hala’o iha edifísiu prinsipal Ministério da Justiça, Colmera, Dili.

Reuniaun ne’e realiza tuir dispozisaun artigu 34 husi Decreto-Lei númeru 52/2023, loron 1 Setembru, kona-ba orgánika Ministério da Justiça. Objetivu husi reuniaun refere atu koordena no diskute asuntu importante sira relasiona ho setor justisa iha Timor-Leste.

Iha ordem do dia, tópiku sira ne’ebé diskute inklui:

  1. Ponto de situasaun kona-ba implementasaun roteiru instalasaun Supremu Tribunal de Justiça, ne’ebé aprezenta husi Dr. Avelino Coelho, nu’udar Presidente Komisaun Recrutamentu no Selesaun Juiz Supremo Tribunal de Justiça.
  2. Apresiasaun proposta alterasaun lei eleitoral, liu-liu kona-ba kompozisaun membru vogais magistradu judisiál no Ministério Públiku iha Komisaun Nasional Eleisaun (CNE).
  3. Análize kona-ba situasaun realizasaun estájiu husi magistradu no defensor estajiáriu sira ne’ebé remata ona VII kursu.

Reuniaun ne’e importante tebes atu garante dezenvolvimentu no fortalecimentu sistema justisa iha Timor-Leste.