DILI, 08 Abríl 2026 – Sua Exelénsia Presidente Tribunal de Rekursu, Dr. Afonso Carmona, ne’ebé akompaña hosi Gabinete Prezidente nian, partisipa iha audiénsia públika ne’ebé organiza hosi Komisaun A Parlamentu Nasionál, iha kuarta-feira ne’e.
Audiénsia ne’e konvoka hosi Komisaun A (Assuntos Constitucionais e Justiça) hodi hala’o diskusaun kle’an ba Projetu Lei nu. 16/VI,(3a) ne’ebé foka ba alterasaun ba lejislasaun eleitórál. Objetivu hosi sorumutu ne’e mak atu rona pareser hosi parte relevante sira hodi garante katak mudansa ba lei eleitórál ne’e bele refleta kualidade demokrasia no legalidade iha rai-laran.
Alende Prezidente Tribunal de Rekursu, partisipa mós iha audiénsia importante ne’e:
- Prezidente CNE (Comissão Nacional de Eleições);
- Diretora JSMP (Judicial System Monitoring Programme);
- Embaixadora Uniaun Europeia iha Timor-Leste.
Iha biban ne’e, Dr. Afonso Carmona ho ninia ekipa Gabinete nian fó kontribuisaun jurídika hodi nune’e alterasaun ba projetu lei ne’e la’o tuir prátika di’ak sira iha kestaun judisiária, nune’e mós asegura harmonizasaun ho Konstituisaun Repúblika.
Diskusaun ne’e hanesan parte hosi esforsu Estadu nian atu moderniza no hametin liután sistema eleitórál, hodi garante transparénsia, no asegura legalidade ba prosesu votasaun sira iha futuru.