DÍLI, 10 Abril 2026 – Sua Exelénsia Presidente Tribunal de Rekursu, Dr. Afonso Carmona, simu audiénsia despedida husi Embaixadór Malázia iha Timor-Leste, Sua Exelénsia Dato’ Amarjit Singh Sarjit Singh, iha Gabinete Presidente TR, foin lalais ne’e.
Iha biban ne’e, Sua Exelénsia Presidente Tribunal Recurso fó kondekorasaun hanesan símbolu rekoñesimentu ba servisu di’ak no dedikasaun ne’ebé Embaixadór hatudu durante ninia misaun diplomátika iha Timor-Leste. Kondekorasaun ne’e mós iha objetivu atu hametin liután lasu amizade no relasaun bilaterál ne’ebé di’ak tebes entre nasaun rua ne’e, liuliu iha kooperasaun judisiária.
Pontu Importante husi Konversa:
- Aderensa ba ASEAN: Iha biban ne’e, Embaixadór Malázia koilia mós kona-ba prosesu Timor-Leste nian atu adere ba organizasaun rejionál ASEAN. Malázia kontinua fó apoiu ba esforsu ne’ebé Timor-Leste hala’o ona hodi sai membru tomak iha tempu badak.
- Kooperasaun Judisiál: Diskusaun mós kobre oinsá hametin liután kooperasaun iha setór justisa no servisu judisiál nian entre Timor-Leste no Malázia, hodi fahe esperiénsia no koñesimentu ba dezenvolvimentu instituisionál.
- Relasaun Amizade: S.E. Dato’ Amarjit Singh sarjit singh hato’o agradesimentu ba kolaborasaun di’ak ne’ebé nia simu husi instituisaun judisiária sira durante hala’o ninia knaar iha Timor-Leste.
S.E. Presidente Tribunal de Recurso, iha nia intervensaun, fó apresiasaun aas ba kontribuisaun Embaixada Malázia nian, ne’ebé durante ne’e ajuda promove dezenvolvimentu iha setor justiça, liuliu liuhusi partilha esperiénsia, formasaun, no kooperasaun institusionál. Nia mos reafirma katak Tribunal de Recurso sei nafatin aberta atu kontinua servisu hamutuk ho parseiru internasionál sira ba hadia sistema judisiáriu iha Timor-Leste.