S.E. Presidente Tribunal de Recursu, Dr. Afonso Carmona, Partisipa iha Serimónia Tomada de Pose Estrutura JFP-ADDD no CNRC.

DILI, 11 Abríl 2026 – Sua Exelénsia Presidente Tribunal de Rekursu , Dr. Afonso Carmona, marka prezensa hodi partisipa iha serimónia tomada de pose ba estrutura foun husi Junta Forca Política-Aliado Defesa do Direito Democrático (JFP-ADDD) no Comité Nasional da Revisão Constituição RDTL-2002 (CNRC), ne’ebé hala’o iha Salaun Lariguto CNE Dili.

Iha serimónia ne’e, S.E. Dr. Afonso Carmona reprezenta órgaun soberania Estadu nian, hodi fó testemuña no asina Termu de Pose ba membru foun sira. Prezensa Sua Exelénsia nian fó mós kbiit legál no dignidade boot ba estrutura sira ne’ebé foin simu knaar hodi serbi direitu demokrátiku no konstituisaun nasaun nian.

Diskursu Presidente JFP-ADDD:

Iha ninia intervensaun, Prezidente JFP-ADDD hato’o mensajen kbiit nian ba membru foun sira husi JFP-ADDD no CNRC. Nia subliña katak pose ne’ebé sira simu ohin mak fiar (konfiansa) boot ne’ebé Estadu entrega ona ba sira-nia kbiit.

“Kargu ne’ebé imi simu mak responsabilidade foun. Ha’u husu ba membru hotu atu hametin servisu hamutuk  no nafatin firme iha lian-metin atu defende direitu demokrátiku. Ho unidade de’it mak ita bele lori JFP-ADDD no CNRC ba oin,” dehan Prezidente JFP-ADDD.

Nia mós hatutan katak estrutura foun ne’e tenke sai ezemplu ba dedikasaun hodi nune’e bele lori mudansa no dezenvolvimentu ne’ebé di’ak liután ba instituisaun, hodi dignifika Konstituisaun RDTL,ne’ebé sai nu’udar baze ba estadu direitu demokrátiku.

Serimónia ne’e remata ho kantu parabéns no foto hamutuk entre Sua Exelénsia Dr. Afonso Carmona ho estrutura foun sira ne’ebé foin simu pose.