Iha loron 30 fulan Abril tinan 2026, Sua Exelénsia Prezidente Tribunal de Recurso, Dr. Afonso Carmona, partisipa iha selebrasaun aniversáriu JSMP ba dala XXV no mós lansamentu relatóriu tinan 2025, ne’ebé realiza iha Qartel Jeral F-FDTL, Fatuhada, Dili.
Iha okaziaun ne’e, JSMP lansa relatóriu importante tolu, mak hanesan: Relatóriu Observasaun Jerál Setór Justisa 2025, Relatóriu Observasaun Parlamentu Nasionál 2025 no Relatóriu Institusionál 2025.
Iha diskursu husi Prezidente JSMP, nia hatete katak papel JSMP iha dezenvolvimentu setór justisa envolve kapasidade intelektual, tamba relatóriu sira ne’ebé produz mai husi prosesu peskiza ne’ebé kle’an no sistemátiku. Nia afirma katak relatóriu sira ne’e iha objetivu atu ajuda setór justisa iha implementasaun Estadu de Direitu Demokrátiku ida ne’ebé forte, no kontribui mós hodi hatun númeru kazu sira, liu-liu kazu ne’ebé relasiona ho ema ho difisiénsia no ho diferensia jéneru. Tuir nia lian, koalia kona-ba Estadu de Direitu Demokrátiku, tenke bazeia ba dadus ne’ebé real no verifikadu.
Iha parte seluk, Sua Exelénsia Prezidente Tribunal de Recurso, Dr. Afonso Carmona, iha nia diskursu hatete katak nia apresia tebes ba JSMP tanbasai hanesan parseiru importante iha kontribuisaun ba funsionamentu sistema justisa, hodi bele aumenta konfiansa públiku nian ba instituisaun judisiál sira.
Sua Exelénsia mos subliña katak lansamentu relatóriu sira ne’e importante tebes hodi identifika no evita lakunas sira iha setór justisa, nune’e bele hadi’a servisu no dezenvolvimentu sistema judisiál iha futuru.
Iha oportunidade ne’e, Sua Exelénsia hato’o mós nia agradese ba juízes, advogadu sira, defensores públiku no procuradores sira hotu ne’ebé durante ne’e kontribui ona ho dedikasaun ba fortalesimentu setór justisa iha Timor-Leste.
Tanba ne’e, nia mos hatete katak Estadu ida ne’e presiza iha sistema justisa ida ne’ebé saudavel no forte, atu garante implementasaun lei ho diak no justu ba sidadaun hotu.
Relasiona ho dezenvolvimentu futuru, Dr. Afonso Carmona hatete katak iha relatóriu tinan 2027, JSMP bele temi mós kona-ba Supremo Tribunal de Justiça, tanba Supremu Tribunal sei instala iha Maio 2026 ida ne, ne’ebé sei sai hanesan pasu importante ida iha fortalesimentu sistema judisiál.
Ikus liu, Sua Exelénsia hato’o nia apresiasaun ba relatóriu tinan 2025 ne’ebé konsidera hanesan “mata dalan” ida hodi orienta dezenvolvimentu setór justisa ba oin.